ვაკის პარკთან მდებარე რესტორან „სენატის“ ყოფილ შენობაში Aspria-ს ფიტნეს დარბაზის გახსნა მეორედ გადავადდა. პრემიუმ ფილიალი თავდაპირველად, 2021 წლის იანვარში უნდა გახსნილიყო, თუმცა გაუთვალისწინებელი ხარჯებისა და შენობის დაზიანებული ინფრასტრუქტურის გამო ერთ-ერთი პირველი ფიტნეს ქსელს, ახალი დარბაზი ვერ დაემატა. Aspria-ს დირექტორის ოთარ თავყელიშვილის თქმით, პანდემიის გამო ფიტნეს ცენტრი მომხმარებლებს ნოემბერში მიიღებს.
„ფიტნეს დარბაზის გახსნის ვადებმა რამდენიმე თვით გადაიწია. მიზეზი არის ის, რომ უცხოეთიდან ახალი დანადგარები ჩამოგვაქვს. სამწუხაროდ, იტალიელებმა კორონავირუსით გამოწვული პანდემიის გამო ტრენაჟორების მოწოდების თარიღი სექტემბრის ნაცვლად, ნოემბრით შეიცვალეს. აღსანიშნავია ისიც, რომ რესტორან „სენატის“ ინფრასტრუქტურა მწყობრიდან სრულად იყო გამოსული, რის გამოც თავდაპირველად გათვალისწინებული ხარჯების მოცულობა ნახევარი მილიონი ლარით გაიზარდა. იმ დროისთვის, როდესაც დანადგარები საქართველოში ჩამოვა, დარბაზის ინფრასტრუქტურა სრულად იქნება მოწესრიგებული“, - განაცხადა ოთარ თავყელიშვილმა.
აღსანიშნავია, რომ Aspria ახალი ფილიალის გახსნა „ექსპო ჯორჯიაში“ იგეგმებოდა, თუმცა ფიტნეს ცენტრის დირექტორი ამბობს, რომ ჯერჯერობით „ექსპო ჯორჯიას“ ხელმძღვანელობისგან საბოლოო პასუხი ვერ მიიღო. კომპანიის გეგმების მიხედვით საგამოფენო სივრცეში ერთ წელიწადში 500 000 დოლარის ღირებულების ახალი ფილიალი უნდა გაიხსნას.
შეგახსენებთ, რომ Aspria-ს პირველი ფილიალი 2012 წელს გაიხსნა. ერთ-ერთი პირველი ფიტნეს ქსელი დღეს თბილისში 4, ხოლო ბათუმში 1 დარბაზით ოპერირებს.
ბაჩო ადამია