შეერთებული შტატების სენატმა ლენდ-ლიზის პროგრამა აღადგინა, რაც პრეზიდენტს ბიუროკრატიული ბარიერების გვერდის ავლით უკრაინისთვის შეიარაღების გაგზავნის უფლებას აძლევს. კანონი შეიარაღების უსასყიდლოდ გადაცემასაც ითვალისწინებს. გადაწყვეტილებას მხარი ორივე პარტიამ დაუჭირა. ინფორმაციას ამის შესახებ POLITICO ავრცელებს.

მიიღე ინფორმაცია უფრო სწრაფად „კომერსანტის“ Telegram-ზე.

რუსეთის უკრაინაში შეჭრის მომენტიდან დღემდე შეერთებულმა შტატებმა უკრაინას $1.7 მლრდ-ის იარაღი გაუგზავნა მათ შორის ტანკსაწინააღმდეგო ჯაველინები, ანტისაჰაერო სტინგერები, კამიკაძე დრონები, ღამის ხედვის საშუალებები. კიევი აცხადებს რომ მიღებული დახმარება კარგია, მაგრამ არასაკმარისი. დეოკუპაციისთვის შეტევითი შეიარაღებაც, მათ შორის ტანკები, თვითმფრინავები და რაკეტებია საჭირო.

ლენდ-ლიზის პროგრამით აშშ 1941-1945 წლებში მოკავშირეებს $50 მლრდ-ით დაეხმარა, რაც დღევანდელი კურსით $700 მლრდ-ს უთანაბრდება. $50 მლრდ-დან $11 მლრდ, დღევანდელი კურსით $154 მლრდ საბჭოთა კავშირს შეხვდა. მაშინ მოსკოვმა ვაშინგტონისგან 7000 თვითმფრინავი, 5200 ტანკი, 4000 სატვირთო, ანტისატანკო ჭურვები, ვაგონები, რადარები ასევე საკვები და 15 მლნ წყვილი ჩექმა მიიღო. დახმარების ნაწილი ვალს წარმოადგენდა, რომლის დაბრუნებაზეც ომის შემდეგ სტალინმა უარი განაცხადა.

ყოფილ მოკავშირეებს შორის ძალიან მალე ცივი ომი დაიწყო, აღმოსავლეთ ევროპის ქვეყნები რკინის ფარდის მიღმა მოექცნენ. 80-იანი წლების ბოლოდან სოციალისტურმა ბანაკმა რღვევა დაიწყო, 1991 წლის დეკემბერში საბჭოთა კავშირი ოფიციალურად დაიშალა, მაგრამ რუსეთმა ძველი იმპერიალისტური პოლიტიკა გააგრძელა. ბოლო 30 წელიწადში პირდაპირ ან ირიბად საქართველოს, აზერბაიჯანის, მოლდოვისა და უკრაინის წინააღმდეგ იბრძოდა. 1994-2000 წლებში ორ ომში 1.5 მლნ-იან იჩქერიის რესპუბლიკაში (ჩეჩნეთში) 200 000 ადამიანი მოკლა, მათ სორის 50 000 ბავშვი.

დღეს მსოფლიო ბუჩასა და მარიუპოლის კადრებით შეძრულია, თუმცა წლების წინ იგივე გაგრაში, სოხუმში, ცხინვალსა და გროზნოშიც ხდებოდა. უკრაინაში შეჭრა დასავლეთისთვის ერთგვარი წითელი ხაზი აღმოჩნდა, ფორმალური სანქციები რეალურმა შეცვალა, გაიზარდა უკრაინისთვის შეიარაღების მიწოდებაც. დამოკიდებულების მკვეთრი ცვლილების მიუხედავად რუსულ ენერგორესურსებს ემბარგო ჯერ არ შეხებიათ, რაც პუტინს ომის დაფინანსების საშუალებას აძლევს.