აშშ-ს სენატორი ჯიმ რიში კონგრესს და ადმინისტრაციას რუსეთის წინააღმდეგ სანქციების გამკაცრებისკენ მოუწოდებს. როგორც მან CNN-თან ინტერვიუში განაცხადა, აუცილებელია აშშ-ს მხრიდან მასზე სანქციების მაქსიმალურად გამკაცრება იმის გათვალისწინებით, რასაც რუსეთი უკრაინაში აკეთებს.
მე გამიხარდება რუსეთის ყველა ბანკის წინააღმდეგ სანქციების ხილვა. ვფიქრობ, იმის გათავლისწინებით, რაც იქ ხდება, სანქციებით ჩვენ ვერ ვიქნებით ზედმეტად უხეშები სანქციებით. ჩვენ უბრალოდ ძალიან მკაცრები უნდა ვიყოთ.... სანქციების ეფექტურობამ მართლაც გაგვაკვირვა, ამიტომ, მოვუწოდებ, კონგრესს ასე გაგრძელებისკენ, – განაცხადა რიშმა.
რუსეთი უკრაინაში 24 თებერვალს, გამთენიისას შეიჭრა და მას შემდეგ განუწყვეტლივ ბომბავს როგორც სამხედრო ობიექტებს, ისე მშვიდობიან მოსახლეობას. მოსკოვი საჯარო განცხადებებში უარყოფს სამოქალაქო ობიექტების მიზანში ამოღებას. გაეროს მონაცემებით, უკრაინა უკვე დატოვა 3.6 მილიონმა ადამიანმა.
უკრაინა რუსეთის ტერორისტ ქვეყნად გამოცხადებას ითხოვს და ჰააგის სასამართლოში ჩივის. სასამართლო პროცესი შედგა, თუმცა პროცესზე არ გამოცხადდა რუსეთის წარმოემადგენელი, რადგან, როგორც ქვეყნის საგარეო საქმეთა სამინისტროს წარმომადგენელი, მარია ზახაროვა, ამბობს, სასამართლოს ამ საკითხზე მსჯელობის ლეგიტიმაცია არ აქვს.
როგორც უკრაინის სახალხო დამცველი აცხდებს, სრული სიზუსტით გროვდება რუსეთის მიერ უკრაინაში ჩადენილი სამხედრო დანაშაულის ყველა ფაქტი და უკრაინა მას სამხედრო ტრიბუნალამდე მიიტანს.
ჰააგაში გაეროს საერთაშორისო სასამართლოს უკრაინაზე რუსეთის თავდასხმის საქმეზე მიღებული გადაწყვეტილებით, რუსეთმა დაუყონებლივ უნდა შეაჩეროს სამხედრო ოპერაციები, თუმცა სასამართლო დადგენილებას რუსეთი ამ დრომდე არ ასრულებს.
რუსეთს უკრაინაში შეჭრის და იქ საომარი მოქმდებების გამო სანქციები დაუწესა ლამის მთელმა მსოფლუიომ, უიშვიათესი გამონაკლისის გარდა.
ქვეყანას ერთი მეორის მიყოლებით ტოვებენ უცხოური კომპანიები. ამის საპასუხოდ რუსეთი ამ კომპანიების რუსეთში არსებული ქონების მითვისებით, კონფისკაციით, ანუ ექსპროპრიაციით, იმუქრება.
რუსეთის საერთაშორისო რეზერვები გაყინულია.
რუბლის კურსზე ზეწოლის პრევენციისთვის ქვეყნის მთავრობამ რუსეთიდან ვალუტის გატანაზე ლიმიტი დააწესა, თუმცა უშედეგოდ. თითქმის 90%-მდეა გაუფასურებული რუბლი.
რუსეთის საფონდო ბირჟა 28 თებერვლიდან დახურულია და მისი გახსნა ამ დრომდე ვერ ხერხდება.
რუსეთი ჩახსნილია გადახდის საერთაშორისო სისტემიდან „სვიფტიდან. რუსეთში შეწყდა Visa-ს, Mastercarის, American Express-ის და JCB-ის და PayPal -ის საგადახდო ბარათების მუშაობა.
კანადამ, აშშ-მა და დიდმა ბრიტანეთმა ემბარგო დაადო რუსულ ნავთობს, რითაც ქვეყანამ მილიარდობით შემოსავალი დაკარგა.
ფრენებს რუსეთის მიმართულებით აჩერებენ უცხური ავიაკომპანიები. თავად რუსული ავიაკომპანიებიც იძულებული არიან შეაჩერონ ყველა საერთაშორისო ფრენა, რადგან სალიზინგო ხელშეკრულებების დარღვების გამო, მათ თვითმფრინავებს ინტენსიურად აყადაღებენ და იჭერენ.
სანქციების გამო რუსი ოლიგარქების იახტებსაც "აპატიმრებენ" მსოფლიოს სხვადასხვა ქვეყანაში.
მოკლედ, რუსეთი სრულ ფინანსურ იზოლაციასა და სრულ ეკონომიკურ ბლოკადაშია მოქცეული. საერთაშორისო სარეიტინგო კომპანიები მას დეფოლტს უწინასწარმეტყველებენ.
ექსპერტების შეფასებით, დეფოლტი რუსეთს როგორც ქვეყნის შიგნით, ასევე მის გარეთაც მოუღებს ბოლოს. დეფოლტის გამოცხადება ნიშნავს, რომ ისინი ვალებს ვერ მოემსახურებიან, შესაბამისად მეორე მხარე დაიწყებს მათი აქტივების დაყადაღებას და ჩამორთმევას შემდგომი გაყიდვის და ვალის ამოღების მიზნით. ეს პროცესი წლობით გრძელდება და ამ დროს ასეთ ეკონომიკას, როგორც წესი, არავინ ეკარება, არც ინვესტორი, არც ექსპორტიორი, არც ბანკი და ა.შ. მინიმუმ მომდევნო 10 წელი და შეიძლება მეტიც, რუსეთი დარჩება იზოლაციაში. მოკლედ რომ ვთქვათ, ესაა ეკონომიკური ფსკერი.