ამერიკელი სენატორების ორპარტიულმა ჯგუფმა წარადგინა კანონპროექტი, რომელიც აშშ-ში რუსული ნავთობის იმპორტს კრძალავს. Reuters-ის ცნობით, კანონპროექტში წერია, რომ რუსული იმპორტის სანაცვლოდ, ჩრდილოეთ ამერიკაში, კანადასა და სხვა ქვეყნებში ნავთობის წარმოება უნდა გაიზარდოს.
კანონპროექტმა სენატი და წარმომადგენელთა პალატა უნდა გაიაროს, ბოლოს კი პრეზიდენტმა მოაწეროს ხელი, რომ კანონის სახე მიიღოს. თუმცა, Reuters-ის ცნობით, თეთრ სახლს არ სურს, მხარი დაუჭიროს ისეთ ნაბიჯებს, რამაც ისედაც მაღალი ინფლაციის ფონზე შესაძლოა, ბენზინის ფასი გაზარდოს.
თეთრი სახლის სპიკერი, ჯენ პსაკი აცხადებს, რომ რუსული ნავთობის იმპორტის აკრძალვამ შესაძლოა, ნავთობის ფასები კიდევ უფრო გაზარდოს, რამაც ამ კვირაში ათწლეულის მაქსიმუმს მიაღწია.
რუსეთის ენერგომატარებლების იმპორტის აკრძალვის შესახებ კანონპროექტი ვლადიმერ პუტინის დასჯას ისახავს მიზნად. მისი ავტორი 100-კაციანი პალატის 18 სენატორია. მათ შორის არიან კონსერვატორი დემოკრატი სენატორი, ჯო მანჩინი და რესპუბლიკელი, ლიზა მურკოვსკი. მსგავსი კანონპროექტი ლიბერალ-დემოკრატმა სენატორმა, ედ მარკიმაც შეიმუშავა. წარმომადგენელთა პალატის სპიკერი, ნენსი პელოსი რუსული ნავთობის იმპორტის აკრძალვას მხარს უჭერს.
„მე ამის მომხრე ვარ. აკრძალეთ რუსეთიდან შემოსული ნავთობი!“ - ამბობს პელოსი.
თეთრ სახლში არ აზუსტებენ, მოაწერს თუ არა ხელს ჯო ბაიდენი აღნიშნულ კანონპროექტს.
მანჩინი-მურკოვსკის კანონპროექტს მხარს უჭერს, ასევე, ნავთობის მწარმოებელი შტატის, მონტანას დემოკრატი სენატორი, ჯონ ტესტერი. მისი თქმით, „ამერიკამ არაფერი არ უნდა შემოიტანოს რუსეთიდან.”
ჯერ გაურკვეველია, მოიპოვებს თუ არა კანონპროექტი სენატში 60 ხმას, რაც მის მისაღებად არის აუცილებელი. თუმცა, Reuters-ის შეფასებით, მისი დამტკიცების შანსებს ზრდის ის ფაქტი, რომ კანონპროექტს დემოკრატი ავტორები ჰყავს.
ენერგეტიკის ინფორმაციის ადმინისტრაციის (Energy Information Administration-EIA) მონაცემებით, შეერთებული შტატები რუსეთიდან 2021 წელს, ყოველთვიურად, საშუალოდ, 20,4 მილიონ ბარელზე მეტი ნედლი ნავთობისა და ნავთობპროდუქტების იმპორტს ეწეოდა, რაც აშშ-ს თხევადი საწვავის იმპორტის, დაახლოებით, 8%-ს შეადგენს.
Par Pacific Holdings პირველი ამერიკული გადამამუშავებელი კომპანია გახდა, რომელმაც გუშინ ჰავაის ქარხნისთვის რუსული ნავთობის შესყიდვა შეაჩერა. EIA-ის მონაცემებით, გასულ წელს ჰავაის კუნძულებზე რუსული ნედლი ნავთობის იმპორტი, თითქმის, 28%-ს შეადგენდა.
რუსეთი ნედლი ნავთობის სიდიდით მეორე ექსპორტიორია მსოფლიოში, რომელიც ყოველდღიურად 4-დან 5 მილიონ ბარელამდე ნავთობის ექსპორტს ეწევა. ის მხოლოდ საუდის არაბეთს ჩამორჩება.
რუსეთი მსოფლიოს ნედლი ნავთობის, დაახლოებით, 10%-ს აწარმოებს.
BPN.GE
ნავთობი
