გასული წლების სექტემბერ-ოქტომბერში გაყიდვები ყოველთვის იკლებდა, თუმცა მიმდინარე სექტემბერ-ოქტომბერში კლება არ შეინიშნება და გაყიდვები სტაბილურად გრძელდება, - აღნიშნულის შესახებ „კომერსანტთან“ „მარდი ჰოლდინგის“ ხელმძღვანელმა ნათია სირაბიძემ განაცხადა.
როგორც სირაბიძე ამბობს, მშენებლობების და ზოგადად აპარტამენტების რეალიზაციის კუთხით აქტიური პერიოდი მაინც ზაფხულია, თუმცა შემოდგომაზეც არსებული ტემპი არ დავარდნილა, რადგანაც ბაზარზე საკმაოდ მაღალი მოთხოვნა ფიქსირდება.
სირაბიძის თქმით, „მარდი ჰოლდინგის“ აპარტამენტები პრემიუმ სეგმენტზეა გათვლილი და შესაბამისად მიმდინარე მოვლენების ფონზე მათზე რუსეთის მოქალაქეების მხრიდან მოთხოვნა ფაქტობრივად არ არის.
„მოთხოვნა როგორც ქართველების ისე უცხო ქვეყნის მოქალაქეების მხრიდან იმდენად მაღალია, რომ გაყიდვებში შემცირება არ შეინიშნება.
ჩვენ ვყიდით როგორც კარკასს ასევე სრულად გარემონტებულ ბინებს. თუმცა ჩვენი აპარტამენტები გათვლილი არ არის ბიუჯეტურ სეგმენტზე, ამიტომ ნაკლებად არის მოთხოვნა იგივე რუსების მხრიდან. ჩვენ თითქმის არ გვყავს რუსი მესაკუთრეები და არც მანამდე გვიწარმოებია სარეკლამო კამპანია. ამიტომაც ძირითადად ჩვენს აპარტამენტებს ყიდულობენ ევროპიდან, ახლო აღმოსავლეთიდან და აზიის ქვეყნებიდან“, - აცხადებს ნათია სირაბიძე.
მისივე თქმით, ჰოლდინგის მიერ გაყიდული ფართების 50% ქართველ მომხმარებელზე, ხოლო დარჩენილი 50%-ით უცხო ქვეყნების მოქალაქეებზე მოდის.
გარდა იმისა, რომ გაზრდილია მოთხოვნა და ეს ფასების ზრდას ხელს უწყობს, საბოლოო ჯამში მშენებლობის გაძვირებას სამშენებლო მასალების გაძვირებამაც შეიწყო ხელი.
„ბოლო პერიოდში სამშენებლო მასალა დაახლოებით 15-20%-ით გაძვირდა, ზოგიერთი სახის საშენი მასალა კი 40-45%-ითაა გაძვირებული. ჩვენ ძირითადად ქართველ იმპორტიორებთან ვურთიერთობთ და გეტყვით, რომ რუსეთ-უკრაინის ომის დაწყებისას გარკვეულ საშენ მასალაზე დეფიციტი წარმოიქმნა, რადგანაც უკრაინიდან პროდუქცია ვეღარ შემოდიოდა. დეფიციტის ფონზე მოხდა ფასების აწევა და დღეს როდესაც ბაზარზე პროდუქციის ჩანაცვლება და დეფიციტის აღმოფხვრა მოხდა, ფასები აღარ შემცირებულა და იგივე შენარჩუნდა“, - აღნიშნა „მარგი ჰოლდინგის“ ხელმძღვანელმა.
ნათია სირაბიძე ამბობს, რომ მიუხედავად იმისა, რომ მშენებლობების ფასები გაძვირებულია და ის მალე კიდევ უფრო გაძვირდება, რადგანაც გაზრდილია მოთხოვნა.
„სამშენებლო მასალების გაძვირების ფონზე მოგვიწია მშენებლობების გაძვირებაც და ჩვენს მაგალითზე ეს 15%-ის ფარგლებშია. თუმცა სამომავლოდ კიდევ 10-20%-ით გაიზრდება.
ზოგადად აშენებულზე ფასი ყოველთვის იმატებს, თუ აქამდე მშენებლობის კონდენციის გამო ფასი დაახლოებით 20%-ით იზრდებოდა, ამიერიდან მოიმატებს 40%-ით მოიმატებს რადგანაც პლუს გაიზარდა მოთხოვნა.
მაგალითისთვის გეტყვით, თუ 1კვ/მ მშენებლობის ეტაპზე ღირდა 400 დოლარი და შემდგომ აშენებული 500 დოლარი. დღეს აშენებული უკვე 600 და 700 დოლარი ღირს“- განაცხადა სირაბიძემ.
აღსანიშნავია, რომ Mardi Holding-ს ამ დროისათვის ორი მშენებარე პროექტი აქვს: Mardi Mall და Mardi Evergreen. Mardi Mall-ი დაახლოებით 45 000 კვ/მ-ის მოიცავს და ფასები შავ კარკასზე 550$-დან იწყება და გარემონტებული ბინებზე 1200$-დან.
რაც შეეხება Mardi Eevergreen-ს, ის მახინჯაურში ზღვის პირას შენდება და საშუალოდ 10 000 კვ/მ სამშენებლო ფართის აერთიანებს. აქ ფასები 1700$-დან იწყება და მხოლოდ აპარტოტელებს აერთიანებს. Mardi Holding-ის ახალი პროექტია ასევე, Mardi Hills-ი. Mardi Holding-ის პროექტებს ოპერირებას Mardi Hospitality უწევს.