ახალი ბიზნესომბუდსმენი, ოთარ დანელია ბიზნესთან სექტორულ შეხვედრებს გეგმავს - ამის შესახებ მან, რადიო ,,პალიტრასა“ და ,,პალიტრანიუსის“ გადაცემაში ,,საქმე“ განაცხადა.
მისი თქმით, ქვეყნისთვის ყველა სექტორი ერთნაირად მნიშვნელოვანია, ამიტომ შეხვდება უკლებლივ ყველას.
,,მე სექტორულ შეხვედრებს ვგეგმავ შემდეგ დღეებში. ჩვენ შევხვდებით უკლებლივ ყველას, რადგან ჩვენი ქვეყნის ეკონომიკისთვის ყველა სექტორი ერთნაირად მნიშვნელოვანია, მიუხედავად მათი მონაწილეობისა მთლიანი შიდა პროდუქტის შექმნაში. პრობლემები ყველაზე აისახა პანდემიის დროს. ჩვენ ცხადია, შევხვდებით ნავთობიმპორტიორებსაც, მაგრამ არ ვარ დარწმუნებული, რომ ისტორიულ მაქსიმუმზე ასულ საწვავის ფასს, აქციზის განაკვეთის ცვლილება დააბალანსებს. ისევ თუ გაიზარდა მსოფლიო ბაზარზე ფასი, მერე რას ვაკეთებთ, ვაქრობთ აქციზს? როგორც ვიცი, ეკონომიკის სამინისტრო შესულია დიალოგში მათთან. ჩვენ დავაკვირდებით მათ კომუნიკაციას და კონტენტს და ამის მიხედვით ჩავერთვებით“, - განაცხადა დანელიამ.
წამყვანის კითხვაზე, აქვს თუ არა ინფორმაცია, როგორია აზარტული თამაშების ბაზრის რეგულირებასთან დაკავშირებით როგორც სექტორის, ასევე რეგულატორი მზაობა, დანელია პასუხობს, რომ მოსაგვარებელი მხოლოდ ტექნიკური საკითხებია.
,,სამუშაოს ძირითადი ნაწილი გაკეთებულია. დარჩენილია ღია საკითხები რომელიც სუფთა ტექნიკური საკითხებია, მაგრამ ამ ეტაპზე რა ინფორმაციასაც ვფლობ პრობლემების 90% ამოწურულია, მაგრამ თუ სადმე სივრცე არის დარჩენილი, სადაც ჩვენი ჩართულობა მნიშვნელოვანი იქნება ჩვენ ჩავერთვებით.
ჩვენი ინფორმაციით სექტორიც და მაკონტროლებელი ორგანოც მზად არიან 1-ლი მარტისთვის. პროცესში უკეთესად დავინახავთ. სიახლეებს თან სდევს ხოლმე ხარვეზებიც და გვინდა ძალიან ახლოს მივყვეთ ამას“, - განცხადა დანელიამ ,,საქმეში“.
შეგახსენებთ, ოთარ დანელია ეკონომიკისა და მდგრადი განვითარების მინისტრის პირველი მოადგილის თანამდებობას იკავებდა, ხოლო საქართველოს ბიზნესომბუდსმენის მოვალეობას ბიზნესომბუდსმენის მოადგილე, ნინო კვეტენაძე ასრულებდა.
bpn.ge