„3+3“ ფორმატის კარი საქართველოსთვის ყოველთვის ღიაა, ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა. დიპლომატის თქმით, რეგიონული პლატფორმა პერსპექტიული და პოპულარული ფორმატია, თუმცა ძალზე მნიშვნელოვანია გარე მოთამაშეების დესტრუქციული ჩარევის გამორიცხვა, რომლებსაც არ სურთ სამხრეთ კავკასიაში რეგიონული უსაფრთხოების სტაბილური სისტემის დანახვა.

„ჩვენ შევთანხმდით, რომ თბილისისთვის კარს ყოველთვის ღია დავტოვებთ და ეს სრულად აქტუალური რჩება ამ ეტაპზე მეორე შეხვედრისთვის მომზადების კონტექსტში“, - განაცხადა ლავროვმა.

შეგახსენებთ, „3+3 ფორმატის ფარგლებში პირველი შეხვედრა მოსკოვში 10 დეკემბერს გაიმართა, თუმცა მასში საქართველოს მონაწილეობა არ მიუღია. ექვსეულის (რუსეთი, ირანი, თურქეთი, სომხეთი, აზერბაიჯანი და საქართველო) პლატფორმა, 3+3 ფორმატი, გულისხმობს რეგიონის ქვეყნების თანამშრომლობის ფორმატს და მისი შექმნის ინიციატივა თურქეთის პრეზიდენტს, რეჯეფ თაიფ ერდოღანს ეკუთვნის. საქართველოს ხელისუფლებამ არაერთხელ დააფიქსირა, რომ ფორმატში, რომელშიც ჩართულია რუსეთი, მონაწილეობას არ განიხილავს.