აშშ-ის ფედერალურმა რეზერვმა მონეტარული პოლიტიკა გაამკაცრა. FED-ის კომიტეტის გადაწყვეტილებით, ქვეყანაში რეფინანსირების განაკვეთი დამატებით 25 საბაზო პუნქტით (0.25%) გაიზარდა. გამკაცრების შედეგად, ფედერალური რეზერვის ძირითადი განაკვეთები 4.75-5.0%-ის ფარგლებში განისაზღვრა, ასეთი მკაცრი მონეტარული პოლიტიკა აშშ-ში 2007 წლის შემდეგ არ ყოფილა.
ამერიკის ფედერალური რეზერვის მიერ რეფინანსირების განაკვეთის ზედიზედ რამდენჯერმე გაზრდის ეფექტი საქართველოს უკვე დაეტყო. ბანკების ასოციაციის ხელმძღვანელი ალექსანდრე ძნელაძე ამბობს, რომ დოლარში სესხები გაძვირდა, საკრედიტო პორტფელის ზრდის ტემპი კი შენელდა, თუმცა ამაზე გავლენას სხვა ფაქტორებიც ახდენს, მათ შორის საქართველოს ცენტრალური ბანკის ბოლო რეგულაციები.
„უცხოურ ვალუტაში საპროცენტო განაკვეთები გაზრდილია და ეს შენარჩუნდება, შეიძლება მცირედი ზრდაც ვიხილოთ, რადგან ამერიკის ფედერალურმა რეზერვმა საკმაოდ მაღლა აწია განაკვეთი და მოლოდინი, რომ ეს არის მაქსიმალური განაკვეთი, არ გვაქვს, მიუხედავად იმისა რომ ძალიან გაზრდილია. ევროშიც შესაძლოა ვიხილოთ მონეტარული განაკვეთის ზრდა და ესეც აისახება განაკვეთებზე.
გარდა ამისა, საქართველოში ლიკვიდობის მაღალი მაჩვენებელია, განსაკუთრებით უცხოურ ვალუტაში, პირველი შემთხვევაა როცა სადეპოზიტო პორტფელმა საკრედიტო პორტფელს მოცულობაში გაასწრო, რაც ერთგვარად იმის წინაპირობაა, რომ უახლოეს მომავალში ასე ვთქვათ აქტიური მოზიდვის აუცილებლობა არ ექნება საქართველოს საბანკო სისტემას და ამან შეიძლება მკვეთრი ნახტომები საპროცენტო განაკვეთებზე არ იქონიოს. თუ განაკვეთების ზრდა მოხდება, ეს თანმიმდევრული იქნება“, — ამბობს ალექსანდრე ძნელაძე.
FED-ის ხელმძღვანელის, ჯერომ პაუელის განმარტებით, მონეტარული პოლიტიკის გამკაცრების ტემპი შერბილებულია, რაც აშშ-ში სამომხმარებლო ფასების ზრდის ტემპის შემცირებითაა განპირობებული. რეფინანსირების განაკვეთი აშშ-ში FED-ის წინა შეხვედრებზეც გაიზარდა 50-75 საბაზო პუნქტებით. SVB ბანკის, Silvergate-ისა და Signature Bank-ის კოლაფსამდე ანალიტიკოსები ფიქრობდნენ, რომ ფედერალური რეზერვი განაკვეთს 0.50%-ით გაზრდიდა, თუმცა მსოფლიოს მასშტაბით განვითარებულმა მოვლენებმა FED-ს სტრატეგიის გადახედვა აიძულა. რაც შეეხება საქართველოს, მონეტარული პოლიტიკის ბოლო სხდომაზე, ეროვნულმა ბანკმა განაკვეთები 11%-ზე დატოვა.