სამხრეთ კორეა შეერთებულ შტატებს უსაფრთხოების მიზნით, ბირთვული შეკავების პროგრამის ფარგლებში, ბირთვულქობიანიანი ბომბდამშენებისა და ნახევარკუნძულის სიახლოვეს ატომური წყალქვეშა ნავების დაბრუნებას სთხოვს. ინფორმაციას ამის შესახებ კორეის ახლად არჩეული პრეზიდენტ იუნ სოკ-იოლის მრჩევლის განცხადებაზე დაყრდნობით Reuters ავრცელებს.
მიიღე ინფორმაცია უფრო სწრაფად „კომერსანტის“ Telegram-ზე.
ახალად არჩეული პრეზიდენტი უფლებამოსილების შესრულებას 10 მაისიდან შეუდგება, იქამდე კი საგარეო პოლიტიკისა და უსაფრთხოების გუნდამ ვაშინგტონში აშშ-ის უსაფრთხოების მრჩეველ ჯეიკ სალვინთან შეხვედრები გამართა. როგორც დელეგაციის ხელმძღვანელმა პარკ ჯინმა განმარტა ქვეყანას მოთხოვნილი წყალქვეშა ნავებიც და ბომბდამშენებიც ჩრდილოეთ კორეისგან მომავალი საფრთხის გასანეიტრალებლად სჭირდება.
პარკი ჯინს ჩინეთი და რუსეთი არ უხსენებია, მაგრამ პოტენციურ საფრთხედ ორივე ქვეყანა განიხილება. კორეის ომის დროს სეულის წინააღმდეგ ფხენიანთან ერთად პეკინი და მოსკოვიც იბრძოდნენ.
1910 წელს იაპონიამ კორეა დაიპყრო. 1945 წელს ის 38-ე პარალელზე საბჭოთა და ამერიკულ ზონებად დაიყო. 1950 წელს ჩრდილოეთ კორეა სამხრეთ კორეას თავს დაესხა. ომი 3 წელიწადს გაგრძელდა, 4 მლნ-მდე ადამიანის სიცოცხლე შეიწირა, მხარეები კი ომამდელ პოზიციებს დაუბრუნდნენ.
ჩრდილოეთ კორეიდან ზუსტი სტატისტიკის მოპოვება შეუძლებელია, სადაზვერვო ინფორმაციაზე დაყრდნობით კი შეიძლება ითქვას, რომ ის პლანეტის ერთ-ერთი უღარიბესი და ამავე დრო ყველაზე ტოტალიტარული სახელმწიფოა. შემოსავალი 1 სულ მოსახლეზე სამხრეთ კორეაში ჩრდილოეთ კორეასთან შედარებით დაახლოებით 25-ჯერ უფრო მეტია.
ბირთვულ კლუბს 2006 წელს ფხენიანიც შეუერთდა და ის დანარჩენი მსოფლიოსთვის კიდევ უფრო საშიში გახდა. მის რაკეტებს შეერთებულ შტატებამდეც კი შეუძლიათ მიღწევა. 2018 წელს აშშ-ის პრეზიდენტი დონალდ ტრამპი, ისტორიაში პირველად, კორეელ დიქტატორ კიმ ჩენ ინს სინგაპურში შეხვდა, მაშინ ესკალაციის საფრთხემ გადაიარა, თუმც დათბობის პერიოდი დიდხანს არ გაგრძელებულა.
კარიბის კრიზისიდან 60 წლის შემდეგ, მსოფლიო ბირთვული აპოკალიფსის საშიშროების წინაშე კიდევ ერთხელ დადგა. უკრაინაში შეჭრის შემდეგ პუტინი რამდენჯერმე ირიბად დაიმუქრა, რომ „წითელ ღილაკს“ თითს დააჭერდა. აპრილის დასაწყისში, პოლონეთმა ამერიკული ბირთვული ქობინების საკუთარ ტერიტორიაზე განთავსების შესახებ თანხმობა განაცხადა, პუტინის მუქარის მიუხედავად ურთიერთგანადგურების შიში მესამე მსოფლიო ომის პრევენციას მაინც ახერხებს.