შაორის ტბაზე მოცურავე კოტეჯი ‘’Shaori Chalet’’ ამჟამად ინვესტორის მოლოდინშია. ტურისტული ობიექტი გაფართოებას და ათი მოცურავე კოტეჯის შექმნას გეგმავს.

როგორც კომპანიის დამფუძნებელი, ვახტანგ იაშვილი BM.GE-სთან საუბრისას აცხადებს, კოტეჯს წლევანდელ სეზონზე არ უმუშავია, რადგან ერთი კოტეჯით ოპერირებისას ხარჯი მეტი იყო, ვიდრე შემოსავალი.

"წლევანდელი სეზონი არ გვიმუშავია, გასულ სეზონზე ბიზნეს მოდელი დავტესტეთ და დამსვენებლებისთვის საკმაოდ მიმზიდველი აღმოჩნდა. ამჟამად საინვესტიციო პროექტად გადავაკეთეთ და ინვესტორის მოძიებაზე ვმუშაობთ.

გვინდა, დიდი პროექტი განვახორციელოთ და ათი მოცურავე კოტეჯი შევქმნათ, რადგან ერთი კოტეჯით ოპერირებისას ხარჯი უფრო მეტია, ვიდრე შემოსავალი, ჩვენ ის თანხაც არ ამოგვიღია, რაც ჩავდეთ", - აცხადებს ვახტანგ იაშვილი.

მისი თქმით, პროექტის დაწყებისას ბევრი გამოწვევა არსებობდა, პირველ რიგში კი ის, რომ არ იცოდნენ, მსგავსი კონცეფციის კოტეჯი გაამართლებდა თუ არა, თუმცა დაინტერესება დიდი აღმოჩნდა.

"კოტეჯი თავისუფალი არცერთი დღე არ ყოფილა, ყოველ დღე დაჯავშნილი იყო, სწორედ ამან დაგვარწმუნა იმაში, რომ უფრო დიდი პროექტი კარგად იმუშავებდა. კოტეჯების რაოდენობის გაზრდის შემდეგ, რა თქმა უნდა, მოგებაც იქნება, ამ ეტაპზე კი ეს შეუძლებელი იყო", - აღნიშნა ვახტანგ იაშვილმა BM.GE-სთან.

ცნობისთვის: შაორი შალე 2020 წლის შემოდგომაზე შეიქმნა, მან 2021 წლის ზაფხულის სეზონზე 220-მდე დამსვენებელი მიიღო, კოტეჯში ერთი ღამის გატარების ღირებულება კი 400 ლარი იყო. კოტეჯის სრულად მოწყობისთვის კომპანიის დამფუძნებლებმა 50 000 ლარის ინვესტიცია ჩადეს.

წყარო: bm.ge/