ჯანდაცვის სფეროს სპეციალისტები აცხადებენ, რომ ფარმაცევტულ ბაზარზე თურქეთიდან შემოტანილი იაფი წამლების დეფიციტი შეიმჩნევა. მათი განცხადებით, აჟიოტაჟური მოთხოვნაა და სიტუაცია იმის ანალოგიურია, რაც ცოტა ხნის წინ შაქრის ბაზარზე დაფიქსირდა – პანიკური შესყიდვების სახით.
მიიღე ინფორმაცია უფრო სწრაფად „კომერსანტის“ Telegram-ზე.
როგორც ორგანიზაცია ,,გახსოვდეს ჰიპოკრატეს“ დამფუძნებელი მარინა ბერაძე „კომერსანტთან“ საუბარში აცხადებს, სააფთიაქო ქსელებში წამლები არათანაბრადაა განაწილებული, რაც უნდობლობას იწვევს და წამლების გაძვირების შიშით ხალხი იაფ მედიკამენტს უკვე არასაჭირო რაოდენობითაც ყიდულობს.
მისი თქმით, გაზრდილი მოთხოვნის გამო შეიძლება ხელოვნურად გაიზარდოს ფასიც, ამიტომ უმჯობესია, რეკლამის კომპონენტი ინფორმაციულ ნაწილში უფრო დაიტვირთოს.
,,რეკლამაში უნდა ჩანდეს მეტი ინფორმაცია, რომ არ მოხდეს დეფიციტის შექმნა ხელოვნურად, რამაც შეიძლება სრულიად უმიზეზოდ გამოიწვიოს ფასების ზრდა, როგორც ეს შაქრის შემთხვევაში მოხდა. ანალოგიური სიტუაცია იკვეთება და ამით საბოლოოდ ისევ მომხმარებელი დაზარალდება. ცხადია ისიც, რომ არავის სჭირდება წამალი, რომელსაც ვადა გაუვა. შენახვას თავისი პირობებიც აქვს. კარგი იქნება, თუ ოჯახის ექიმი თვითონ მისცემს ამ წამლებს პაციენტებს, როგორც ამას სხვა ნორმალური ქვეყანა აკეთებს. მდგომარეობა თანდათან დასტაბილურდება, მაგრამ იმდენად ნელი ტემპით, რომ შეიძლება ამასობაში ხელოვნური დაბრკოლება შეიქმნას. ამ ეტაპზე კი გასაძლიერებელია მუშაობა, რომ სააფთიაქო ქსელების ყველა ფილიალში არსებობდეს ხელმისაწვდომი თურქული მედიკამენტი, რომ ადამიანმა შეძლოს თავისი საცხოვრებლის სიახლოვეს წამლის ყიდვა, როცა მოუნდება“, - აცხადებს მარინა ბერაძე „კომერსანტთან“.
ფარმაცევტული კომპანიების წარმომადგენელთა ასოციაციის დირექტორის ირაკლი მარგველაშვილის განცხადებით, ბაზარზე იაფი თურქული წამლების დეფიციტი ნამდვილად არის, რამაც პანიკა გამოიწვია.
მისივე თქმით, ასოციაცია ძალიან აფასებს სამინისტროს მცდელობებს, რომ მედიკამენტზე ფასი დაიწიოს, მაგრამ ასეთ პროცესებს ყოველთვის ახლავს გარკვეული რისკები და პრობლემები. ერთ-ერთი ასეთი პრობლემა კი საკმარისი რაოდენობის მედიკამენტების უზრუნველყოფა.
„სააფთიაქო ქსელებს საკმარისი მედიკამენტები არ აქვთ – ფიზიკურად ვერ შოულობენ იმ რაოდენობას თურქეთში, რადგან მწარმოებელს გარკვეულ რაოდენობაზე მეტი მედიკამენტის გამოშვება არ ჰქონდა დაგეგმილი. თურქეთის ქარხნებმა შესაძლოა უზრუნველყონ საჭირო რაოდენობის წამლების წარმოება, მაგრამ ჩვენ ხომ არ ვსაუბრობთ მხოლოდ თურქულ მწარმოებლებზე – ჩვენ ვსაუბრობთ საერთაშორისო მწარმოებლებზე, რომლებმაც თურქეთში წამლები შეიტანეს ნაკლებ ფასად და სწორედ ამ წამლებიდან გვინდა ჩვენ მედიკამენტების ჩვენ ბაზარზე შემოტანა“,- განმარტავს ირაკლი მარგველაშვილი jandacva.ge-თან.
მისივე თქმით, თურქეთის ბაზრიდან მედიკამენტების გამარტივებული წესით შემოტანა ვერ ჩაანაცვლებს რეგულარულ მოწოდებას. იმისთვის კი, რომ ეს მედიკამენტები ხელმისაწვდომი გახდეს ყველასთვის და არა მხოლოდ მათთვის, ვისაც შეხვდება, უნდა გატარდეს სხვა რეფორმებიც. პირველი – ესაა ელექტრონული რეცეპტი იმპლემენტაცია, რისკენაც ნაბიჯები უკვე გადაიდგა. მარგველაშვილის განმარტებით, მედიკამენტზე დანახარჯის ერთ-ერთი მთავარი მიზეზი არის არასწორად და ჭარბად დანიშნული წამლები, რაც ადამიანის არა მხოლოდ ჯიბეს, არამედ ჯანმრთელობასაც აზიანებს.
შეგახსენებთ, რომ თურქეთიდან მედიკამენტების გამარტივებული იმპორტის დაწყების შემდეგ ქვეყანაში ყველაზე მოხმარებადი 50-მდე მედიკამენტი უკვე გაიაფდა. წლის ბოლომდე ამ რაოდენობის 200-მდე გაზრდა იგეგმება. ფასები 35-დან 75%-მდე შემცირდა.
ჯანდაცვის სამინისტროს ინფორმაციით, პირველი აპრილის მდგომარეობით, ჯამში 216 სხვადასხვა დასახელების მედიკამენტია თურქეთიდან შემოსული, რაც 600 ათასამდე კოლოფია.
მარი ჩიტაია