შაქრის მიწოდების მხრივ პრობლემა არ არის. იმპორტიორები ამბობენ, რომ მარაგში წყვეტა ისედაც არ ყოფილა, თუმცა ხელოვნური პანიკის გამო ფასები გაიქცა და უკვე ძნელად რეგულირებადია. დისტრიბუტორთა ასოციაციის ხელმძღვანელის ივა ჭყონიას ინფორმაციით, ბოლო დღეებში ბრაზილიიდან 2 000 ტონა შაქარი შემოვიდა და კიდევ 5 000 ტონას ელიან. შესაბამისად, წარმოება და მაღაზიებიც ჩვეულებრივად მარაგდება.
,,რაც ,,პრობლემა“ გაჩნდა, გავიძახი, რომ ბაზარზე დეფიციტი არ ყოფილა. სამომხმარებლო ქცევა არ გვაქვს, მოსახლეობა ელემენტარულ დონეზეც ვერ ფლობს სამომხმარებლო კულტურას, ამან გამოიწვია პრობლემა. წარმოებისთვის მომარაგების წყვეტა არც წინა დღეებში იყო და ჩვეულებრივ ვაწვდიდით, ფასებს რა უნდა ეშველოს, ეს არის მნიშვნელოვანი საკითხი, რაც ასე მარტივად ვერ გვარდება. თუკი ზოგიერთ მაღაზიაში 5 ლარს აღწევს ფასი, ესეც მათი პასუხისმგებლობის საკითხია და უნდა მოეკითხოთ. ახალი პარტია რომ შემოვა, უფრო დასტაბილურდება სიტუაცია, რომელიც ისედაც აწყობილი იყო და ხელოვნურად დაძაბეს მდგომარეობა. მწარმოებლებისთვის შაქრის ფასი იგივეა, რაც ბოლო დრომდე იყო“, - ამბობს ჭყონია ,,კომერსანტთან“ და დასძენს, რომ შაქარი დღეს აჟიოტაჟის გამო მხოლოდ საცალო გაყიდვებში გაიზარდა.
,,ფასი ჯერჯერობით ვერ დარეგულირდება, ქსელურ სუპერმარკეტებში უფრო მალე დაიწყება ეს პროცესი, მაგრამ გადამყიდველი რომ 130 ლარის ნაცვლად, პროდუქტს 200 ლარში ჰყიდის, ესეც ისევ ხალხის ბრალია. ძნელად წარმოსადგენია, რა შეიძლება მოხდეს, რომ ყველა მომხმარებელი 1 ტომარა შაქრის ყიდვას შეეცდება და მომარაგებას დაიწყებს! სწორედ ეს ხდებოდა, ქართულ ბაზარზე ასეთი სიტუაცია არ მახსოვს, რაღაც ამოუხსნელი მოვლენაა“, - ამბობს ივა ჭყონია.
შეგახსენებთ, რომ პანიკა ბაზარზე 9 მარტს გაჩნდა და მოულოდნელად შაქარი 2,35 ლარიდან 5 ლარამდე გაძვირდა. მიუხედავად იმისა, რომ მარაგები არის, დახლებზე პროდუქტი 4 ლარზე იაფად თითქმის არსად იყიდება.
ცნობისთვის, მსოფლიოში შაქრის უმსხვილესი ექსპორტიორი ბრაზილიაა. 2021 წელს საქართველოში 60.4 მილიონის ღირებულების 120.7 ათასი ტონა შაქარი შემოვიდა.საქართველომ შესყიდული შაქრის თითქმის ნახევარი 57 ათასი ტონა ($28.2 მლნ) ბრაზილიიდან მიიღო, იმპორტში შემდეგ ადგილებზე თურქეთი ($14.3 მლნ) და პოლონეთი ($10.6 მლნ) არიან.
მარი ჩიტაია