გაყინული რუსული აქტივების კონფისკაცია ერთ-ერთი თემაა, რომელიც 23-24 მარტს ევროკავშირის სამიტზე განიხილება - ამის შესახებ ევროპული საბჭოს თავმჯდომარემ, შარლ მიშელმა განაცხადა. მისივე თქმით ისინი ასევე განიხილავენ ევროკავშირის სამხედრო წარმოების შესაძლებლობების გაფართოებას და ერთი წლის განმავლობაში უკრაინისთვის მილიონი ჭურვის მიწოდების საკითხს.

„ჩვენი მიზანია კიევს 12 თვის განმავლობაში მილიონი ჭურვი  და ადეკვატური დაფინანსება მივაწოდოთ. ჩვენ უნდა მივიღოთ ზომები ევროპის თავდაცვის მრეწველობის საწარმოო შესაძლებლობების გასაფართოებლად. ჩვენ ასევე გავაგრძელებთ მუშაობას, დავაკისროთ პასუხისმგებლობა რუსეთს მის მიერ ჩადენილ დანაშაულებზე, გამოვიყენოთ გაყინული რუსული აქტივები და ჩავრთოთ საერთაშორისო საზოგადოება წესებზე დამყარებული მსოფლიო წესრიგი მხარდასაჭერად“ - წერს მიშელი.

მიშელმა ასევე განმარტა, რომ სამიტის დასაწყისში უკრაინის პრეზიდენტი ვოლოდიმირ ზელენსკი  ევროკავშირის ხელმძღვანელებს მიმართავს, რომლებსაც ყველა დამსწრე, ტრადიციის მიხედვით, „ურყევ მხარდაჭერას გამოუცხადებს“.

გარდა ამისა სამიტზე განიხილება ენერგიისა და ელექტროენერგიის ფასების შემცირების გზები, მიგრაციის  მზარდი კრიზისი, საგარეო ვაჭრობა და ევროკავშირის გაზრდილი კონკურენტუნარიანობა მსოფლიო ასპარეზზე. სამიტის მონაწილეები ასევე განიხილავენ ევროზონის ფინანსურ და ეკონომიკურ მდგომარეობას სილიკონ ველის ბანკისა და Credit Suisse-ის ბოლო დაშლის შემდეგ.