„ყველის ფასის მიმართულებით პირდაპირ კატასტროფა ხდება, შარშან თუ იმერული ყველი 7-10 ლარი ღირდა, წელს მისი ფასი 19 – 20 ლარია. იმერული ყველის ფასი თითქმის სულგუნის ფასს გაუტოლდა, შესაბამისად სულგუნის ფასიც იზრდება“ -  ამის შესახებ “კომერსანტს“ ყველის მწარმოებელთა ასოციაციის პრეზიდენტმა ანა მიქაძემ განუცხადა. მისი თქმით, ქსელურ და ბრენდულ მაღაზიებში ყველის ფასი გაცილებით მაღალია.

„მე რომ ვნახე იმერული ყველი 16 ლარად ეჭვი გამიჩნდა რატომ  ჰქონდა ასეთი დაბალი ფასი. ზოგიერთ მაღაზიაში და სუპერმარკეტში 20 ლარზე მეტიც ღირს და სულგუნის ფასმა 30 ლარსაც კი მიაღწია.  რაც  შეეხება გუდის ყველს, რომელიც დიდი  ხანია გაძვირდა, მისი ფასი 35 ლარიდან 40 ლარის ფარგლებში მერყეობს. აღარაფერს ვამბობ ისეთ დელიკატესებზე, როგორიცაა ტენილი, დამბალხაჭო და სხვა გაპრანჭული ყველები, რომელიც ქართულ ბაზარზე ისედაც იშვიათობაა და სულ რამდენიმე ადამიანი აწარმოებს. მაგალითად ტურისტულ  უბნებში  ერთი კილოგრამი დამბალხაჭოს ფასი 70 ლარია. ყველაფერი გაძვირებულია“, - აღნიშნა ანა მიქაძემ.

რაც შეეხება მიზეზებს, მიქაძე რძის პროდუქტების გაძვირების მიზეზად ინფლაციას, ცხოველების საკვებზე  ფასის და ტრანსპორტირების ხარჯების ზრდას ასახელებს.

„დაახლოებით 20 წლის წინ როდესაც დოლარი ძალიან გაძვირდა და შემდეგ ლარმა გამყარება დაიწყო, მაშინ მიშა ჯიბუტმა თქვა, რომ ლარი კი გამყარდა, მაგრამ ჯონჯოლთან მიმართებაში გაუფასურდაო, დღესაც ეგრეა ყველთან მიმართებაში, თითქოს ლარი სტაბილურობისკენ მიიწევს, მაგრამ ყველთან მიმართებაში უფასურდება. კატასტროფული მდგომარეობაა. ჩემთვის ეს არის წარმოუდგენელი რაღაც,  როგორ შეიძლება ადამიანმა, რომელსაც ყველი ყოველ დღე სჭირდება ვერ იყიდოს, შეიძლება ადამიანმა მოითმინოს უხორცობა, რაღაც სხვა პროდუქტზე თქვას უარი, მაგრამ ყველი სჭირდება. სასიცოცხლოდ მნიშვნელოვანი პროდუქტია და მისი ფასი კი ზევით მიიწევს. ლოგიკა იმაში მდგომარეობს, რომ ფერმერებსაც ყველაფრის ფასი გაუძვირდათ, ცხოველის საკვები, ტრანსპორტირება, ბენზინი, ყველაფერი გაძვირებულია. კი შეიძლება  ერთჯერადი ხარჯია და წინასწარ იმარაგებენ ყველაფერს, მაგრამ ეს ერთჯერადი ხარჯებიც ძალიან ძვირი უჯდება. თუ საკუთარი საძოვარი არ აქვს, იჯარით უნდა აიღოს, ქერი გაძვირებულია, ხორბალიც  გაძვირებულია, ამიტომ არის ეს სიტუაცია“, - აღნიშნა ანა მიქაძემ.

ანა მიქაძე ამბობს, რომ ყველზე გაზრდილი ფასის მიუხედავად გაყიდვები არ შემცირებულა და საკმაოდ აქტიურად იყიდება.

თაკო კვაჭანტირაძე