„დღეს, მესამე კვირაა სოფელში დენი არ გვაქვს, პრობლემა, რომლის მოგვარებასაც 2-3 დღე სჭირდებოდა, დროში ისე იწელება, დაზუსტებით, იმასაც ვერ გვეუბნებიან როდის გარემონტდება, როდის ჩართავენ ჰესს!“, - ეს ინფორმაცია შატილში კაფე „სანფლაუერის“ დამფუძნებელმა გიორგი ჭინჭარაულმა სოციალურ ქსელში გამოაქვეყნა. მისივე თქმით, შატილში შემოსავლის ერთადერთი წყარო ტურიზმია.
„კომერსანტი“ დუშეთის მუნიციპალიტეტის მერს, მანანა ნარიმანიძეს დაუკავშირდა, როგორც მან ჩვენთან საუბრისას აღნიშნა, ერთი კვირაა რაც ჩეხი სპეციალისტები პრობლემის მოგვარებაზე მუშაობენ და შატილის მოსახლეობას ელექტროენერგია სრულად მიმდინარე კვირის ბოლომდე აღუდგება.
„წყალდიდობის შედეგად ადგილობრივი ჰესი დაზიანდა, ჩეხი სპეციალისტებუ კვირაზე მეტია ჩამოსული არიან და მუშაობენ, როგორც კომუნიკაციის დროს გვითხრეს მაქსიმუმ კვირის ბოლოს შატილს ელექტროენერგიის მიწოდება სრულად აღუდგება. ჰესი მთლიანად გაარემონტეს, სამუშაოები ამ წუთშიც მიმდინარეობს. იწმინდება ტურბინები და კვირის ბოლოს შატილს ელექტროენერგია ექნება“, - აღნიშნა მანანა ნარიმანიძემ.
თაკო კვაჭანტირაძე