“2023 წლის პირველი კვარტალი ეკონომიკური ზრდით გამორჩეული ვერ იქნება, თუმცა წელს შესაძლოა გარკვეული სოლიდური ზრდა დაემატოს, მაგრამ ეს დამოკიდებულია, როგორც ქვეყნის შიგნით, ასევე ქვეყნის გარეთ მიმდინარე პროცესებზე“ - ამის შესახებ რადიო „კომერსანტის“ გადაცემაში „კომერსანტის დილა“ ეკონომიკის ექსპერტმა ვახტანგ ჭარაიამ ისაუბრა. მისი თქმით, საქართველოს ეკონომიკაზე მნიშვნელოვნად შეიძლება იმოქმედოს ისეთმა ფაქტორებმა როგორიცაა პოლიტიკური არასტაბილურობა ქვეყნის შიგნით, ქვეყნის გარეთ კი, რუსეთ - უკრაინის ომი. ეკონომიკური ზრდისთვის ერთ-ერთ მნიშვნელოვან მიმართულებად ეკონომიკის ექსპერტი ენერგო სექტორს ასახელებს.
„ეკონომიკური ზრდისთვის ჩვენთვის ახლა ძალიან მნიშვნელოვანია ენერგეტიკის მიმართულება, რომელიც ბოლო პერიოდში გამოიკვეთა და უკავშირდება შავი ზღვის ფსკერზე კაბელის გაყვანას , რომელიც რიგითი კაბელი არ არის და მას შეუძლია საქართველოში იმ დამოკიდებულების დასრულება, რომელიც ჰესებს უკავშირდება. ჰესებში არ არის პრობლემა, აქ პრობლემაა ცუდ მშენებლობაში და არასწორ დაგეგმარებაში.
ჩვენთან ელექტროენერგიის მოხმარება მზარდია, ამ დროს ფულს ვიხდით მეზობელ ქვეყნებში და ჩვენ ენერგიაზე ვამბობთ უარს, მაგრამ ეს კაბელი ევროკავშირის მხრიდანაც სხვა ინტერესებს გამოიწვევს და მათი მხარდაჭერა უფრო გამჭვირვალე გახდება“, - აღნიშნა ვახტანგ ჭარაიამ.
ჭარაიას თქმით თუ საქართველო აქამდე სატრანზიტო ქვეყანა იყო და ტვირთებს ატარებდა, ეს კაბელი მისცემს შესაძლებლობას, რომ ევროკავშირს ელექტროენერგიის დივერსიფიკაციაში დაეხმაროს.
„შესაბამისად, საქართველოში პოლიტიკური და ფინანსური პოზიციები ძლიერდება და ქვეყანა მთლიანობაში სწორ გზას დაადგება. ამ ყველაფერში სახელმწიფომაც თავისი წილი პასუხისმგებლობა უნდა გამოიჩინოს და არ უნდა დაუშვას ისეთი საუბრები, როგორიც გვქონდა, რომ ეს ჰესი თურქეთისთვის შენდება და ა.შ. საქართველოში აშენებული ჰესი, საბოლოოდ საქართველოში რჩება და დასაქმებულების უმრავლესობაც ადგილობრივი იქნება.
ფინანსური კუთხით სახელმწიფოს როლი უნდა იყოს მაქსიმალური და ეს მოგვცემს იმის საშუალებას, რომ ეკონომიკის მაღალი ზრდის გზას მალე დავადგეთ. მაგალითად შარშანდელი ეკონომიკური ზრდა, საქართველოს მოსახლეობაზე ვერ გადანაწილდა და ჰესს სწორედ ის პოტენციალი აქვს, რომ ის თბილისში კი არ აშენდება, აშენდება რეგიონში და მათ მოუტანს ფინანსურ სარგებელს“, - აღნიშნა ვახტანგ ჭარაიამ.
თაკო კვაჭანტირაძე