შავი ზღვის საერთაშორისო უნივერსიტეტმა ადმინისტრაციული სამართლის ფორუმს უმასპინძლა. ფორუმი საქართველოს ადვოკატები დამოუკიდებელი პროფესიისათვის, იურიდიული პროფესიის განვითარების ცენტრი და შავის ზღვის საერთაშორისო უნივერსიტეტის ორგანიზებით ჩატარდა.

ფორუმის დაწყებამდე გაფორმდა ურთიერთთანამშრომლობის მემორანდუმი შავი ზღვის საერთაშორისო უნივერსიტეტსა და „საქართველოს ადვოკატები დამოუკიდებელი პროფესიისათვის“ შორის.

ფორუმზე განიხილეს ადმინისტრაციული სამართლის მნიშვნელოვანი და პრობლემური საკითხები, მათ შორის, ადმინისტრაციული სამართალწარმოების დროს სარჩელის დასაშვებობის, დროებითი განჩინებისა და სარჩელის უზრუნველყოფის ღონისძიების გამოყენებისა და უძრავი ქონების რეგისტრაციასთან დაკავშირებული დავების განხილვის პრობლემური საკითხები.

ფორუმის პირველ სესიას უძღვებოდა თბილისის სააპელაციო სასამართლოს ადმინისტრაციულ საქმეთა პალატის მოსამართლე, ხატია არდაზიშვილი, რომელმაც სასამართლოში ადმინისტრაციული საქმის წარმოების საკითხებზე და გამოწვევებზე ისაუბრა.

მეორე სესია ჩაატარა საქართველოს უზენაესი სასამართლოს მოსამართლემ თამარ ოქროპირიძემ, რომელმაც მონაწილეებს უძრავი ქონების რეგისტრაციასთან დაკავშირებული დავების განხილვის პრობლემური საკითხები გააცნო.

ღონისძიებაში მონაწილეობა მიიღეს საქართველოს ადვოკატთა ასოციაციის წევრებმა, პრაქტიკოსმა იურისტებმა და საჯარო მოხელეებმა, რომლებიც დაინტერესებულნი არიან ადმინისტრაციული სამართლის საკითხებით“.

საქართველოს ადვოკატები დამოუკიდებელი პროფესიის თავმჯდომარე ნინო ლიპარტია განმარტავს, რომ მემორანდუმის გაფორმება ემსახურება უნივერსიტეტსა და ორგანიზაციას შორის თანამშრომლობის გაძლიერებას. სწორედ მის ფარგლებში იგეგმება არაერთი პროექტი, რომელიც მიზნად ისახავს უნივერსიტეტის სტუდენტთა და ორგანიზაციის წევრთა პროფესიულ განვითარებას.

აღსანიშნავია, რომ საქართველოს ადვოკატები დამოუკიდებელი პროფესიისათვის 12 წელის უწყვეტ რეჟიმში ახორციელებს საგანმანათლებლო  პროექტებს, როგორც ქვეყნის შიგნით ასევე, ქვეყნის ფარგლებს გარეთ. ამ პროექტებში ადვოკატებთან ერთად, მუდმივად არიან ჩართული სასამართლო ხელისუფლების წარმომადგენლები. ღონისძიების დროს ფართო ადგილი ეთმობა დისკუსიას მოსამართლეებსა და ადვოკატებს შორის. სწორედ ამგვარი დიალოგი  წყობს ხელს სასამართლო პრაქტიკის განვითარებასა და მართლმსაჯულების პროცესში არსებული პრობლემის აღმოფხვრას“- აცხადებს ნინო ლიპარტია