საქართველოდან საზღვაო გზით გასატანი, შესაბამისი წესით დეკლარირებული საქონლის საბაჟო საწყობიდან ნავსადგურში გადაზიდვის ვადა 12 საათიდან 24 საათამდე გაიზარდა. შემოსავლების სამსახურის ინფორმაციით, გადასაზიდი ტვირთის აღრიცხვა ხორციელდება გამარტივებული წესით და არ საჭიროებს დალუქვას საბაჟო საწყობიდან ნავსადგურში ტრანსპორტირების პროცესში.

ფოთის პორტის მფლობელი კომპანია APM Terminals „კომერსანტთან“ აღნიშნული ცვლილების შედეგად ტვირთების გადაზიდვის დღიური ნორმის ზრდაზე და პროცედურების გამარტივებაზე საუბრობს.

„საერთაშორისო გადაზიდვების ხელშეწყობის მიზნით საბაჟო კანონმდებლობაში შეტანილ ცვლილებებს მივესალმებით, რადგან აღნიშნული ცვლილებები, ტვირთის ტრანსპორტირების პროცედურებს მნიშვნელოვნად ამარტივებს. ცვლილებების მიხედვით გადასაზიდი ტვირთის აღრიცხვა განხორციელდება გამარტივებული წესით და აღარ საჭიროებს დალუქვას საბაჟო საწყობიდან ნავსადგურში ტრანსპორტირების პროცესში. ეს იმას ნიშნავს რომ მაგალითად, გემში ჩატვირთვის მიზნით თუ ერთი მანქანის მომზადებას სჭირდებოდა დაახლოებით 3 წუთი, ახლა ეს დრო მნიშვნელოვნად შემცირდება, რაც თავის მხრივ შეამცირებს გემის დაყოვნების დროს, გაზრდის ოპერაციების ეფექტიანობას და ხელს შეუწყობს ტვირთების ნაკადს როგორც საქართველოდან ისე კავკასიისა და ცენტრალური აზიის ქვეყნებიდან“, — აღნიშნავენ APM Terminals-ში.

შემოსავლების სამსახურში განმარტავენ, რომ საკანონმდებლო ცვლილებები მნიშვნელოვნად შეამცირებს გემების მოცდენის, ასევე ტვირთების საერთაშორისო გადაზიდვასთან დაკავშირებული სატვირთო და ლოგისტიკური ოპერაციებისათვის საჭირო დროს. ამასთან, გაიზრდება ქვეყნის, როგორც სატრანზიტო დერეფნის პოტენციალი და შესაძლებელი იქნება იმ გამოწვევებთან გამკლავება, რაც განპირობებულია გაზრდილი ტვირთბრუნვით.