ბიზნესმენი ლაშა პაპაშვილი „კომერსანტთან“ რძემჟავა პროდუქტების დღგ-სგან გათავისუფლების საჭიროებაზე საუბრობს. მისი თქმით, სახელმწიფომ იმპორტირებული პროდუქტების ადგილობრივით ჩანაცვლებაზე უნდა იზრუნოს.
„ჯერ კიდევ, კვირიკაშვილსა და ქუმსიშვილს ვთხოვდით და ახლა ამ მთავრობასთანაც დავაყენეთ ეს საკითხი. მნიშვნელოვანია,რომ ხელისუფლებამ რძე-მჟავა პროდუქტების დღგ-სგან გათავისუფლების გადაწყვეტილება მიიღოს.
დახლის 80% არის იმპორტირებული რძის პროდუქტებით, დაწყებული კარაქით, დამთავრებული რძით. ყველა მათგანი არის ფხვნილი და აქვთ მოხმარების ერთწლიანი და ორწლიანი ვადა. ამის ჩასანაცვლებლად, მსოფლიოს ყველა ქვეყნის პრიორიტეტია ექსპორტის გაძლიერება, ან იმპორტის ჩანაცვლება. შეგვეძლო ჩვენი რძე გვქონოდა,რომელიც არის პირველადი მოხმარების და განსაკუთრებით საჭირო მოზარდი თაობისთვის,“- ამბობს ლაშა პაპაშვილი.
როგორც ცნობილია, ნედლი რძის მწარმოებლები სახელმწიფოს რძის პროდუქტების წარმოებაზე გარკვეულ შეღავათებს სთხოვენ. მათ შორისაა, რძის წარმოების საუბსიდირება.
რძისა და რძის პროდუქტების მწარმოებელთა ასოციაციის აღმასრულებელმა დირექტორმა კახა კონიაშვილმა „კომერსანტთან“ განაცახდა, რომ სახელმწიფო 9 პროდუქტის კურსთა შორის სხვაობას ასუბსიდირებს. ერთ-ერთი პროდუქტი კი რძის ფხვნილია, რომელიც პრიორიტეტულ ნუსხაში შევიდა.
„ეს ფაქტი ცოტა გამიკვირდა კიდეც. რადგან საუბარი იყო იმაზე, რომ მომხმარებელს საბოლოო პროდუქტი არ გაძვირებოდა. შესაბამისად, ეს უნდა ყოფილიყო მომხმარებლისთვის შეღავათი. მესმის, რომ სხვა პროდუქტს მომხმარებელი პირდაპირ ყიდულობს მაღაზიაში და როდესაც რძის ფხვნილზე გვაქვს საუბარი უნდა გავითვალისწინოთ ის ფაქტი, რომ მას მომხმარებელი პირდაპირ მაღაზიაში არ ყიდულობს. ჯერ უნდა გადამუშავდეს და შემდეგ სხვადასხვა პროდუქტის სახით მიეწოდოს მომხმარებელს. ამ შემთხვევაში ჩნდება კითხვა რატომ ვასუბსიდირებთ იმპორტს და არ ვუწყობთ ხელს ადგილობრივ წარმოებას.“-ამბობს კონიაშვილი.
ქართული რძისპროდუქტების კომპანია „ცეზარის“ ხელმძღვანელი ცეზარ კახაძე კი განმარტავს, რომ რძის ფხვნილის სუბსიდირება არასწორად მიმართული თანხაა, რომელიც ქვეყნიდან გაედინება და ადგილობრივი პროდუქტის რეალიზაციასაც უშლის ხელს.
“ჩამონათვალში სურსათის სუბსიდირების დროს მოხვედრილია რძის ფხვნილი, რომელიც მოიაზრება ნატურალური რძის პროდუქტის კონკურენტად. თუმცა, დღეის მდგომარეობით, ნატურალური რძისა და მისგან დამზადებული პროდუქტის ფასს, მკვეთრად გადაუსწრო რძის ფხვნილისგან დამზადებულმა პროდუქტმა. მთავრობა კი ამას ასუბსიდირებს. არადა, შესაძლებელია, რომ ნატურალურ რძეზე გააკეთოს იგივე და ამით მეწარმესაც დაეხმარონ.რძის ფხვნილის სუბსიდირება წყალში გადაყრილი ფულია და ფერმერს აზარალებს.
ახლა სჯობს, რომ ამ პერიოდში ქართველ ფერმერს დაეხმარონ. ამ ნაბიჯით მხოლოდ ერთი და ორი ადამიანი არ მოითბობს ხელს და ქვეყნიდანაც არ გავა ის ფული, რაც რძის ფხვნილში დაიხარჯება.” -ამბობს ცეზარ კახაძე.
სოფო ქსოვრელი