საქართველოს ეროვნული ბანკის მონეტარული პოლიტიკის კომიტეტის სხდომა დღეს 12 საათზე გაიმართება. დარგის ექსპერტების მოლოდინით, სებ-ი რეფინანსირების განაკვეთს არსებულ 11%-ზე დატოვებს, თუმცა ინფლაციის კლების ფონზე, მცირედით შემცირებაც არ არის გამორიცხული.

საქართველოს საბანკო ასოციაციის ხელმძღვანელი ალექსანდრე ძნელაძე მონეტარული პოლიტიკის შერბილებას უახლოეს სხდომაზე არ ელის. მისი თქმით, რეფინანსირების განაკვეთის შემცირებისთვის საჭირო ტენდენციები უკვე იკვეთება, თუმცა სავარაუდოდ ეს უფრო ზაფხულის შემდეგ მოხდება.

„გარკვეული ნიშნები არის უკვე, რომ შეიძლება რეფინანსირების განაკვეთის შემცირებაზე დაიწყოს საუბარი, მაგრამ განცხადებებიდან გამომდინარე, რომელსაც უახლოეს წარსულში აკეთებდა ეროვნული ბანკი, რთულია ვივარაუდოთ, რომ მონეტარული პოლიტიკის შერბილება უახლოეს სხდომაზე მოხდება. თუმცა, ის ტენდენციები რასაც ჩვენ ვხედავთ, მათ შორის ინფლაციის შემცირება, იძლევა უკვე იმ ნიშნებს, რომ ზრდაზე ნამდვილად არ იქნება საუბარი“, — ამბობს ალექსანდრე ძნელაძე.

„თიბისი კაპიტალის“ მთავარი ეკონომისტი, ოთარ ნადარაია აღნიშნავს, რომ მონეტარული პოლიტიკის შერბილების წინაპირობები ცალსახაა, რადგან მომდევნო ერთი წლის ინფლაციის პროგნოზი დამაიმედებლად გამოიყურება, თუმცა რეფინანსირების განაკვეთის შემცირება დღევანდელ სხდომაზე არ არის მოსალოდნელი.

„მონეტარული პოლიტიკის კომიტეტმა შესაძლოა განაკვეთის დაწევა უფრო მაისისათვის გადადოს. ჩვენი აზრით, ასეთ შემთხვევაში, აქცენტი იმპორტირებული პროდუქტების გარეშე ინფლაციასა და ბოლო პერიოდში საერთაშორისო მასშტაბით გაურკვევლობის ზრდაზე იქნება გაკეთებული“, - აცხადებენ TBC Capital-ში.

Galt & taggart-ის ეკონომისტი ლაშა ქავთარაძე კი მიიჩნევს, რომ უფრო სწორი იქნება თუ ცენტრალური ბანკი ინფლაციის კლების ტენდენციის ფონზე მონეტარული პოლიტიკის განაკვეთს შეამცირებს. მისივე თქმით, ინფლაციის მაჩვენებელი ეროვნული ბანკის მიერ განსაზღვრულ მიზნობრივ მაჩვენებელს ანუ 3%-ს მიმდინარე წლის ბოლო კვარტალში დაუახლოვდება. 

მონეტარული პოლიტიკის ბოლო სხდომაზე, 2023 წლის 1-ელ თებერვალს, ეროვნულმა ბანკმა რეფინანსირების განაკვეთის უცვლელად 11%-ზე დატოვების გადაწყვეტილება მიიღო.