,,შეიძლება მძიმე დღეები იყოს, მაგრამ არაფერი ტრაგიკული“ - ასე აფასებს რუსეთის შესაძლო დეფოლტის გავლენას საქართველოს ეკონომიკაზე საქართველოს საბუნებისმეტყველო მეცნიერებათა აკადემიის ვიცე-პრეზიდენტი, ეკონომისტი ალექსანდრე თვალჭრელიძე.
ცნობისათვის, საერთაშორისო სააგენტო S&P Global-ის მიერ გამოქვეყნებული ინფორმაციიდან ირკვევა, რომ 12 აპრილს რუსეთმა საგარეო ვალზე დეფოლტი განიცადა.
„რუსეთმა უკვე ვერ გადაიხადა საგარეო ვალი, ანუ ის უკვე დეფოლტის წინაშეა. ეს პროცესი თუ გაგრძელდა, რუსეთის რუბლის კონვერტაცია შეწყდება და ხის ვალუტად გადაიქცევა. რუსეთთან ისედაც შემცირებულია ვაჭრობა, ერთადერთი მნიშვნელოვან ასახვა იქნება გზავნილების კუთხით. უნდა გავითვალისწინოთ, რომ რუსეთი არ არის საქართველოს მთავარი პარტნიორი. მთავარი პარტნიორი თურქეთია. დაახლოებით იქნება ის მდგომარეობა, რაც პირველი ღვინის ემბარგოს დროს იყო, მაგრამ ბიზნესი მერე მარტივად გადაეწყო.
ვერაფერს კატასტრიფულს ვერ ვხედავ, შეიძლება მძიმე დღეები იყოს, მაგრამ არაფერი ტრაგიკული. არც ისეთი საშიშია მგელი, როგორც თავს გვაჩვენებს. გასაგებია, რომ ფქვილი გაძვირდება, თუ პირდაპირი მეზობლისგან არ შემოვიტანთ, მაგრამ ვიპოვით ბაზრებს, ფქვილზეც და სხვა ყველაფერზეც. წიწიბურას შემოვიტანთ ინდოეთიდან. არაერთი ქვეყანაა, საიდანაც ხორბალს შემოვიტანთ და საერთოდ, იმედია არსებული რეალობა წაგვადგება, რომ დასკვნები გამოვიტანოთ. 12 მლნ ვიყავით დავით აღმაშენებლის დროს და გარანტიას გაძლევთ, საკვები პროდუქტის იმპორტი არ ხდებოდა. თვითკმარი ქვეყანაა და ხალხი უნდა გაინძრეს, რომ პროდუქტი საკმარისი იყოს და ვიყიდოთ-გავყიდოთზე არ ვიყოთ დამოკიდებული. რეგიონში ომი, რა თქმა უნდა, რთული გამოწვევაა, მაგრამ არა დაუძლეველი“, - განუცხადა თვალჭრელიძემ ,,ბიზნესპრესნიუსს“.
დეფოლტი
