ტყიბულის მინდელის სახელობის შახტში მომხდარი ტრაგედიის დეტალებზე ,,კომერსანტთან“ მეშახტეები საუბრობენ. რას შეეძლო აფეთქების გამოწვევა,  საუბარი უჭირთ, სანამ გამოძიება შედეგს დადებს. თუმცა ეჭვობენ, რომ შესაძლოა ჰაერში მეთანის კონცენტრაციის არასწორი აღრიცხვა მოხდა ან ტექნიკური უსაფრთხოების პარამეტრები იქნა უგულებელყოფილი.  ყოველ შემთხვევაში, როგორც  შახტის  თანამშრომელი გაგა ისაკაძე ამბობს, მიუხედავად ბოლო წლებში შრომის უსაფრთხოების მიმართულებით გატარებული ღონისძიებებისა, ტექნიკური პრობლემა მეშახტეებისთვის ისევ დიდი გამოწვევაა.

,,დაზუსტებით ვერაფერს ვიტყვი, მიმდინარეობს გამოძიება.  კონკრეტულ  დეტალებზე საუბარი ჩვენი მხრიდან ჯერჯერობით უხერხულია, სანამ გამოძიების შედეგი არ გვეცოდინება.  ამ ეტაპზე ცნობილია მხოლოდ ფაქტი, რომ აფეთქდა მეთანი,  ამ დროს ჩვენი უკვე იმყოფებოდნენ უსაფრთხო ადგილზე, სადაც აფეთქების ტალღას, წესით, არ უნდა მოეღწია.  ადგილზე იმყოფება შრომის ინსპექცია და ველოდებით,  რა დასკვნას გააკეთებს. მიუხედავად იმისა, რომ დღეს ტყიბულის შახტში არ არის ის მდგომარეობა, რაც ვთქვათ, 4-5 წლის წინ იყო, ბევრი რამ გამოსწორდა, ტექნიკური საკითხები მაინც დარჩა გამოწვევად. დანერგილია მონიტორინგის შესანიშნავი სისტემა, რომელიც  ატყობინებს  მეთანის კონცენტრაციას, რა რაოდენობითაა და შესაძლებელია თუ არა სამუშაოს უსაფრთხო შესრულება.  თუკი აღრიცხვა სწორი იყო, რატომ მისცეს იქ აფეთქების საშუალება. ბევრი კითხვაა, რასაც პასუხი უნდა გაეცეს. ალბათ, ტექნიკური საკითხებისთვის მეტი ყურადღება უნდა დაეთმოთ“, - ამბობს ,,კომერსანტთან“ გაგა ისაკაძე.

მისი ინფორმაციით, შახტში მეთანის აფეთქებისას დაღუპული მუშა ჭაბუკი სოფრომაძეა, რომელიც ამფეთქებლად მუშაობდა.

მასთან ერთად კიდევ 8 ადამიანი დაშავდა, რომელთაგან 3 რეანიმაციულ მკურნალობას თბილისში, დამწვრობის ცენტრში გადის.

ის, რომ ტყიბულის შახტში შრომის უსაფრთხოების მიმართულებით ვითარება გაუმჯობესებულია, ,,კომერსანტთან“ ადასტურებს გაერთიანებული პროფკავშირების წარმომადგენელი  თამაზ დოლაბერიძე. მისი თქმით, აშკარაა, რომ შეცდომაა დაშვებული და შეიძლება  იგი გაზის   გაზომვის ავტომატური სისტემის მუშაობას უკავშირდებოდეს.

,,ძნელია პროგნოზის გაკეთება, როცა ტრაგედიის ზუსტი მიზეზი არ ვიცით. 2019 წლის შემდეგ საწარმოო შემთხვევები არ გვქონია, რაც მიუთითებს, რომ საწარმოო უსაფრთხოების სისტემა გაუმჯობესებული იყო. გამოძიებას დავიწყებდი, იყო თუ არა ჰაერში მეთანის კონცენტრაცია გადაჭარბებული. ეს მონაცემი შახტს აუცილებლად უნდა ჰქონოდა. რამდენადაც ვიცი,  მეთანის კონცენტრაციას ყოველდღიურად აღრიცხავენ. ყველაფერია, რომ სიტუაცია აკონტროლო, რა მიზეზით მოხდა, რამ გამოიწვია ფატალური შედეგი, გამოკვლეული უნდა იქნას.  უსაფრთხოების მიმართულებით შახტებში გარკვეული ზომები მიღებულია, მაგრამ აშკარაა, რომ საკმარისი არ არის. ადამიანის სიცოცხლეს და ჯანმრთელობას ეხება საქმე და ყველა კითხვას უნდა გაეცეს პასუხი“, - ამბობს თამაზ დოლაბერიძე,

შეგახსენებთ, რომ ძლიერი აფეთქება მინდელის შახტში 30 იანვარს, ღამის 11:00 საათისთვის იმ დროს მოხდა, როდესაც მიწის სიღრმეში მეშახტეები იმყოფებოდნენ. დაიღუპა ერთი ადამიანი, დაშავდა რვა.

მარი ჩიტაია