ანა აბაშიძემ დაახლოებით ორი წლის წინ სამსახურის დატოვება და პირადი საქმიანობის დაწყება გადაწყვიტა. ასე შეიქმნა ტექსტილის ატელიე „ციმ-ციმ“-ი.
ატელიეს დამფუძნებელი BM.GE-თან საუბრისას ამბობს, რომ ამ ეტაპზე ყველა საქმეს პირადად აკეთებს და დღეში თუნდაც რამდენიმე საათი მუშაობის შემდეგ ნებისმიერ სამსახურზე უკეთეს ანაზღაურებას იღებს.
„2020 წელს გადავწყვიტე, რომ სამსახური დამეტოვებინა და ჩემი პირადი საქმიანობა დამეწყო. ხელსაქმე ბავშვობიდანვე მიყვარდა და ეტაპობრივად ჩავერთე ამ პროცესში - თავიდან მხოლოდ ჩემი შვილისთვის ვკერავდი აქსესუარებს, შემდეგ ახლობლებისთვის და იმდენად დიდი დაინტერესება იყო, რომ გადავწყვიტე შეკვეთებიც მიმეღო.
ამ ეტაპზე ჩემი პატარა ატელიე მაქვს რუსთავში, ჩემივე სახლში, ყველა საქმეს მე ვაკეთებ - შეკვეთების მიღებიდან დაწყებული მისი ჩაბარებით დამთავრებული და დღეში რამდენიმე საათი მუშაობის შემდეგაც კი ნებისმიერ სამსახურზე უკეთეს ანაზღაურებას ვიღებ.
შეკვეთები ძალიან ბევრია, უკვე მარტო ვეღარ ავუდივარ, ამიტომ პირველ ეტაპზე დამატებითი კადრების აყვანა გადავწყვიტე, ალბათ 2 ადამიანს დავასაქმებ და რამდენიმე მსურველს საქმიანობას ვასწავლი, ხოლო შემდეგ უკვე საწარმოს სახლის გარეთ გადავიტან და უფრო გავაფართოვებ. ახლახან გამოვაცხადე ვაკანსია და უკვე ძალიან დიდი გამოხმაურება მივიღე, ბევრი კვალიფიციური და მოტივირებული ადამიანი მიკავშირდება და აღმოჩნდა, რომ საქართველოში ადამიანებს უჭირთ საქართველოში საკუთარი ცოდნის რეალიზება", - განაცხადა ანა აბაშიძემ.
რაც შეეხება გამოწვევებს, „ციმ-ციმ“-ის დამფუძნებელი გვიყვება, რომ პროდუქციისთვის საჭირო ქსოვილები საქართველოში ორჯერ და სამჯერ უფრო ძვირი ღირს, ვიდრე მწარმოებელ ქვეყნებში, ამიტომ შემდგომში მათ იმპორტირებას გეგმავს.
„ახლა ლილოს ბაზრობაზე დავდივარ და რამდენიმე დღის მარაგი მომაქვს, თუმცა ეს ქსოვილები საქართველოში ორჯერ და სამჯერ უფრო ძვირი ღირს, ამიტომ ბიზნესისთვის მისი იმპორტირება ბევრად უფრო მომგებიანია და შემდგომში მათ შემოტანას ვგეგმავ.
ამ ეტაპზე 35%-იან მარჟაზე ვმუშაობ და აქსესუარების საფასურიც საკმაოდ დაბალია", - განმარტავს ანა აბაშიძე.
ინფორმაციისთვის, „ციმ-ციმ“-ის პროდუქციის შეძენა სოციალური ქსელის საშუალებითაა შესაძლებელი. ატელიე „აწარმოე საქართველოს“ მინიმალური 2 992 ლარიანი თანადაფინანსებით ამოქმედდა.
წყარო: https://bm.ge