საქართველო ეკონომიკური თავისუფლების რეიტინგში 9 ადგილით ჩამოქვეითდა და 35-ე ადგილზე გადაინაცვლა. როგორც „კომერსანტთან“ საუბრისას ეკონომისტმა ირაკლი მაკალათიამ განაცხადა, 9 ადგილით ჩამოქვეითება შესაძლოა კატასტროფული მაჩვენებელი არ არის, თუმცა ნეგატიური ფაქტორია, როდესაც ეს მაჩვენებელი დინამიკაშია.
„ჩვენ გვახსოვს ისიც, რომ საქართველო ამ რეიტინგში ათეულშიც იყო. შემცირება ნიშნავს იმას, რომ ეკონომიკური თავისუფლების მიმართულებით ქვეყანა ვერ პროგრესირებს, აქ კიდევ ძალიან საინტერესო საკითხი არის ის, რომ ეკონომიკური თავისუფლების ინდექსში სუბინდექსებთან ერთად განსაზღვრული კერძო საკუთრების დამკვიდრება ქვეყანაში განსაზღვრული არ არის, ანუ ეს მაჩვენებელი გაანგარიშებაში შეტანილი არ აქვთ, იმიტომ რომ განვითარებულ ქვეყნებში კერძო საკუთრების პრობლემა არ დგას და ეკონომიკური აქტივები მაქსიმალურად კერძო საკუთრებაშია გადასული. ეს სუბინდექსიც რომ გაანგარიშებაში იყოს შეტანილი ბევრად მძიმე მდგომარეობაში ვიქნებოდით. ეკონომიკური თავისუფლება ნიშნავს ფინანსურ დამოუკიდებლობას, ფინანსური დამოუკიდებლობა არის ფინანსებზე ხელმისაწვდომობა და ფინანსურ დამოუკიდებლობას და ფინანსებზე ხელმისაწვდომობას კერძო საკუთრება განსაზღვრავს.
თუ გაქვს კერძო საკუთრება იქნება ეს მიწა, თუ სხვა ქონება, შენ შეგიძლია შენი საკუთრებით მოიზიდო დამატებითი ფინანსები. გაყიდვით, აქციის გამოშვებით, ობლიგაციით და ა.შ. გაქვს იმის შესაძლებლობა, რომ ფინანსები მოიზიდო და რაც მეტ ფინანსებს მოიზიდავ ეკონომიკურად მით უფრო განვითარებული იქნები, ამას ჩვენ მოწყვეტილი ვართ, იმიტომ რომ ეკონომიკური აქტივების 70 -80% არის სახელმწიფო საკუთრებაში, შესაბამისად თუ საერთო სურათში შევიტანთ იმას თუ რა მდგომარეობაშია კერძო საკუთრების დამკვიდრება, რეიტინგში ბევრად უფრო უკან ვიქნებოდით, რაც ცივილურ სამყაროს კიდევ უფრო დაგვაშორებდა“ - აღნიშნა ირაკლი მაკალათიამ .
თაკო კვაჭანტირაძე