ნიდერლანდების მუზეუმებმა და საკონცერტო დარბაზებმა, მთავრობის არათანმიმდევრული კოროვირუსული პოლიტიკის გამო, შემოქმედებითი პროტესტი მოაწყვეს და თავიანთ დარბაზებში სილამაზის სალონები გახსნეს. ინფორმაციას BBC ავრცელებს.

საერთო ლოკდაუნის ბოლო შემსუბუქების შემდეგ, რაც ძალაში დეკემბრის შუა რიცხვებიდან შევიდა, საპარიკმახეროებს, ფრჩხილების სალონებსა და სპორტდარბაზებს, მომხმარებელთა რაოდენობის შეზღუდვით, მუშაობის განახლების უფლება მიეცათ, ხოლო მუზეუმები, თეატრები, ბარები და კაფეები კვლავ დახურულია.

კულტურის მუშაკები აღშფოთებული დარჩნენ იმით, რომ მთავრობამ მუზეუმში შესვლა უფრო სარისკოდ ჩათვალა, ვიდრე მანიკურისტთან ვიზიტი. ამდენად, პროტესტის ნიშნად მათ სამუზეუმო დარბაზებში პარიკმახერები, მანიკურისტები და ტრენერები მიიწვიეს.

აქციას არაერთი ცნობილი მუზეუმი სხვადასხვა ფორმით შეუერთდა. მათ შორის არის ვინსენტ ვან გოგის მუზეუმი ამსტერდამში, Panorama Mesdag-ის ხელოვნების მუზეუმი ჰააგაში და სამეფო გალერეა Mauritsgeis, სადაც განთავსებულია იან ვერმერის ცნობილი ნამუშევარი, „გოგონა მარგალიტის საყურით.“

ვან გოგის მუზეუმის დირექტორი, ემილი გორდენკერი იმედოვნებს, რომ აქციის შემდეგ მთავრობა თავის მიდგომას გადახედავს.

„მუზეუმში ვიზიტი უსაფრთხო და არანაკლებ მნიშვნელოვანია, ვიდრე მანიკურის გაკეთება და შესაძლოა, უფრო მეტად მნიშვნელოვანიცაა. ჩვენ მხოლოდ თანმიმდევრულობას ვითხოვთ, რაც ამჟამად არასაკმარისია,“ - აცხადებს ემილი გორდენკერი.

მუზეუმში მიწვეული ერთ-ერთი პარიკმახერის თქმით, აქციას იმიტომ შეუერთდა, რომ ვერ გაეგო, თუ რატომ მიეცა მუშაობის საშუალება, მუზეუმის მუშაკებისგან განსხვავებით, მითუმეტეს, დარბაზებში საკმარისი ადგილია იმისთვის, რომ ადამიანები ერთმანეთზე არ გადადიოდნენ.

„აქ ბევრი ადგილია, მაშინ როცა სუპერმარკეტში ერთდროულად რამდენიმე ასეული ადამიანი იყრის თავს. ეს, უბრალოდ, აბსურდია,“ - აცხადებს პარიკმახერი.

შემოქმედებით პროტესტს რამდენიმე საკონცერტო დარბაზიც შეუერთდა, რადგან არსებული შეზღუდვით, ორკესტრის წევრებს რეპეტიციებზე შეკრება შეუძლიათ, მაგრამ საზოგადოებისთვის კონცერტების გამართვა აკრძალულია, ამიტომ ამსტერდამის Concertgebouw-ის ორკესტრმა თავის რეპეტიციაზე პარიკმახერები, კლიენტებთან ერთად, მიიწვია.

BPN.GE