ლარი ყოველდღიურად გამყარების ახალ რეკორდებს ხსნის. ეროვნული ბანკის მიერ გამოქვეყნებული მონაცემების მიხედვით, ბოლო ვაჭრობის შედეგად აშშ დოლარის ღირებულებამ 2.5973 ლარი შეადგინა, ამაზე დაბალი მაჩვენებელი ბოლოს 2018 წლის 5 სექტემბერს დაფიქსირდა, როდესაც ერთი აშშ დოლარი 2.5844 ლარი იყო.

რა გავლენას მოახდენს კურსის გამყარება ექსპორტიორ კომპანიებზე, ამის შესახებ „კომერსანტთან“ „ეფეს საქართველოს“ („ნატახტარი“) კორპორატიულ საქმეთა დირექტორმა ნიკოლოზ ხუნძაკიშვილმა ისაუბრა.

„ლარის გამყარება ექსპორტიორი კომპანიების შემოსავლებს შეამცირებს და ეს ბუნებრივი პროცესია. ჩვენ რეალურად წარმოების ხარჯები არ გვიმცირდება, უფრო სწორედ მცირედით გვიმცირდება, რადგან ჩვენთვის იმპორტირებული საქონელია ნედლეული, თუმცა ადგილობრივი ხარჯები როგორიცაა მაგალითად მუშახელის ანაზღაურება, ლოგისტიკის თანხები და კომუნალური გადასახადები, ისინი არ მცირდება. თუმცა ეს არ არის იმდენად დამაზიანებელი ბიზნესისთვის, რომ რაიმე კატასტროფული შედეგების წინაშე დავდგეთ. პროცენტულად თუ შევხედავთ, შემოსავლები გვიმცირდება, მაგრამ ეს არ არის საგანგაშო“, — აღნიშნავს ნიკოლოზ ხუნძაკიშვილი.

რა შეიძლება ჩაითვალოს ექსპორტიორებისთვის ლარის გამყარების საგანგაშო ნიშნულად, ამაზე ნიკოლოზ ხუნძაკიშვილი ამბობს, რომ ერთი დოლარი 2 ლარიც რომ გახდეს, რაც ნაკლებსავარაუდოა, ანალოგიური სიტუაცია იქნება.

„ლარი 2-იან ნიშნულზეც რომ ჩამოვიდეს, ჩვენი შემოსავლები ისე არ შემცირდება რომ აქ წარმოებას პრობლემა შეექმნას. გარდა ამისა, როდესაც ჩვენ ექსპორტზე ვსაუბრობთ ეს ქართული კომპანიებისთვის არის დამატებითი შემოსავალი, მთავარი ბაზარი მაინც საქართველოა. მიუხედავად იმისა, რომ ინდუსტრიაში ყველაზე მსხვილი ექსპორტიორები ვართ, ეს მაინც არ ახდენს ისეთ გავლენას ჩვენს საერთო პორტფელში, რომ მაგალითად ექსპორტი საერთოდ რომ განულდეს კომპანიის ფუნქციონირებას შეექმნას საფრთხე. არმგონია საქართველოში არსებობდეს ისეთი კომპანიები, რომლებსაც ამ ტიპის საფრთხე შეექმნება. ბიზნესს აქვს ის თვისება, რომ მოერგოს, გამონახოს სხვა რესურსი, გადაანაწილოს მიმართულებები და ა.შ. ზოგადად დივერსიფიცირება არის მთავარი გამოსავალი“, — ამბობს ნიკოლოზ ხუნძაკიშვილი.

დღეს ლარი Bloomberg-ის სავაჭრო სისტემაში აქტიურად მყარდება და 2.59-იან ნიშნულზეა, რაც ბოლო წლების გამყარების რეკორდული მაჩვენებელია.