ყოველ ოთხშაბათს 10:10 საათზე რადიო კომერსანტი თავის მსმენელს სთავაზობს რუბრიკას  „შენი საგადასახადო მრჩეველი“.

„შენი საგადასახადო მრჩეველი“ -  „კომერსანტისა“ და კომპანია „გრანთ თორნთონის” ერთობლივ პროექტს წარმოადგენს.

15 მარტის გადაცემა, რომელსაც გრანთ თორნთონის საგადასახადო მიმართულების მენეჯერი ნათია ჩაგანავა უძღვებოდა,  მაღალმთიანი დასახლების სტატუსის საწარმოს და ფიზიკური პირის არსებულ საგადასახადო შეღავათებს მიეძღვნა.

ვის შეიძლება მიენიჭოს მაღალმთიან დასახლებაში მუდმივად მცხოვრები პირის სტატუსი? როგორც გრანთ თორნთონის საგადასახადო მიმართულების მენეჯერი განმარტავს, ფიზიკურ პირს მაღალმთიან დასახლებაში მუდმივად მცხოვრები პირის სტატუსი ენიჭება, იმ შემთხვევაში თუ ის აკმაყოფილებს შემდეგ კრიტერიუმებს:

ა) არის საქართველოს მოქალაქე.

ბ) რეგისტრირებულია მაღალმთიან დასახლებაში.

გ) ყოველი კალენდარული წლის განმავლობაში, ჯამში 9 თვის ან 9 თვეზე მეტი ვადით, ფაქტობრივად ცხოვრობს მაღალმთიან დასახლებაში.

რა საგადასახადო შეღავათით ისარგებლებს ასეთი პირი?

მაღალმთიან დასახლებაში მუდმივად მცხოვრები პირი სარგებლობს შეღავათებით  საშემოსავლო  და ქონების გადასახადებში, კერძოდ:

პირველი -  საშემოსავლო გადასახადით არ იბეგრება მაღალმთიან დასახლებაში მუდმივად მცხოვრები  პირის  მიერ კალენდარული წლის განმავლობაში მიღებული 6000 ლარამდე დასაბეგრი შემოსავალი, თუ იგი შემოსავალს იღებს ამავე მაღალმთიან დასახლებაში საქმიანობით. ეს შეღავათი არ ვრცელდება  საბიუჯეტო ორგანიზაციიდან ხელფასის სახით მიღებული შემოსავალზე. 

მეორე -  საშემოსავლო გადასახადით არ იბეგრება მაღალმთიან დასახლებაში მუდმივად მცხოვრები პირი რომლის კმაყოფაზეა 18 წლამდე ასაკის სამი ან სამზე მეტი შვილიდა  და ეს პირი დასაქმებულია ამ მაღალმთიან დასახლებაში არსებულ საბიუჯეტო ორგანიზაციაში.  საშემოსავლო გადასახადით არ იბეგრება  3000  ლარამდე მიღებული ხელფასი. 

მესამე - მაღალმთიან დასახლებაში მუდმივად მცხოვრებ პირს რომლის კმაყოფაზეა 18 წლამდე  ერთ ან ორი შვილი და ეს პირი  აღნიშნულ მაღალმთიან დასახლებაში დასაქმებულია საბიუჯეტო ორგანიზაციაში. ასეთ შემთხვევაში,  კალენდარული წლის განმავლობაში მიღებულ 3000 ლარამდე ხელფასთან მიმართებაში, პირი ისარგებლებს 50% იანი შეღავათით საშემოსავლო გადასახადში.  

მეოთხე -  მიწის გადასახადისაგან თავისუფლდება მაღალმთიან დასახლებაში მუდმივად მცხოვრები სტატუსის მქონე პირის საკუთრებაში არსებული, ამავე მაღალმთიანი დასახლების ტერიტორიაზე მდებარე მიწის ნაკვეთი.

შესაბამისად, ყურადღება უნდა მიექცეს იმ გარემოებას, რომ მხოლოდ მაღალმთიან დასახლებაში მუდმივად ცხოვრება არ არის საკმარისი იმისათვის, რომ ისარგებლოთ შეღავათით და მნიშვნელოვანია, რომ შემოსავალიც მიღებული იქნას ამავე მაღალმთიან დასახლებაში არსებული წყაროდან.

ნათია ჩაგანავამ გადაცემაში ასევე განიხილა შეღავათები მაღალმთიან საწარმოსთან მიმართებაში.

ვინ ანიჭებს საწარმოს მაღალმთიანი დასახლების საწარმოს სტატუსს?

მაღალმთიანი დასახლების საწარმოს სტატუსის მიზნებისათვის მეწარმე სუბიექტი შეიძლება იყოს როგორც საწარმო იურიუდიული პირი, ასევე მეწარმე ფიზიკუი პირი.  მაღალმთიანი დასახლების საწარმოს სტატუსის მისაღებად მეწარმე სუბიუექტმა განცხადებით (წერილობითი ან ელექტრონული ფორმით) უნდა მიმართოს  საქართველოს ფინანსთა სამინისტროს შემოსავლების სამსახურს.

- მეწარმე სუბიექტისათვის მაღალმთიანი დასახლების საწარმოს სტატუსის მინიჭების შესახებ გადაწყვეტილებას იღებს საქართველოს მთავრობა, რაზეც  გამოსცემს შესაბამის  განკარგულებას. 

- მაღალმთიანი დასახლების საწარმოს სტატუსის მქონე პირთა რეესტრს აწარმოებს შემოსავლების სამსახური.

რა საგადასახადო შეღავათებით სარგებლობს მაღალმთიანი დასახლების საწარმო?

მეწარმე სუბიექტი, რომელსაც, საქართველოს კანონმდებლობის შესაბამისად, მინიჭებული აქვს მაღალმთიანი დასახლების საწარმოს სტატუსი, თავისუფლდება გადასახადებისაგან თუ  საქმიანობას ახორციელებს მხოლოდ შესაბამისი მაღალმთიანი დასახლების ტერიტორიაზე. ასეთ პირს ექნება შემდეგი შეღავათები:

•             საშემოსავლო გადასახადით არ იბეგრება მაღალმთიანი დასახლების საწარმოს სტატუსის მქონე მეწარმე ფიზიკური პირის (ინდივიდუალური მეწარმეს) მიერ მაღალმთიანი დასახლების     საწარმოს სტატუსის ფარგლებში განხორციელებული საქმიანობით მიღებული შემოსავალი – და ეს შეღავათი ვრცელდება  სტატუსის მინიჭებიდან 10 კალენდარული წლის განმავლობაში.

•             მაღალმთიანი დასახლების საწარმოს მიერ ამავე მაღალმთიან დასახლებაში საქმიანობით მიღებული მოგება არ იბეგრება მოგების გადასახადით და ეს შეღავათი ვრცელდება სტატუსის მინიჭებიდან 10 კალენდარული წლის განმავლობაში.

•             ქონების გადასახადისაგან თავისუფლდება მაღალმთიანი დასახლების საწარმოს საკუთრებაში არსებული, ამავე მაღალმთიანი დასახლების ტერიტორიაზე მდებარე ქონება – ეს შეღავათი ვრცელდება  სტატუსის მინიჭებიდან 10 კალენდარული წლის განმავლობაში.