ყოველ ოთხშაბათს 10:10 საათზე რადიო კომერსანტი თავის მსმენელს სთავაზობს რუბრიკას  „შენი საგადასახადო მრჩეველი“.

„შენი საგადასახადო მრჩეველი“ -  „კომერსანტისა“ და კომპანია „გრანთ თორნთონის” ერთობლივ პროექტს წარმოადგენს.

29 მარტის გადაცემა, რომელსაც გრანთ თორნთონ საქართველოს უფროსი საგადასახადო კონსულტანტი დავით ღავთაძე უძღვებოდა, საწარმოს/ორგანიზაციის ქონების გადასახადის დეკლარაციას მიეძღვნა.

რა სახის ქონებაზე უწევს საწარმოს/ორგანიზაციას დეკლარაციის წარდგენა და გადასახადის გადახდა და როდის არის ბოლო ვადა

ქონებისა და მიწის შესახებ ქონების გადასახადის დეკლარაციის წარდგენისა და გადახდის ბოლო ვადა საწარმოსა და ორგანიზაციისათვის არის კალენდარული წლის 1 აპრილი. რეზიდენტი საწარმო ან ორგანიზაცია ქონების გადასახადს იხდის შემდეგი სახის ქონებაზე:

• პირველი - ბალანსზე ძირითად საშუალებად ან/და საინვესტიციო ქონებად აღრიცხულ აქტივებზე, დაუმონტაჟებელ მოწყობილობებზე, დაუმთავრებელ მშენებლობაზე, აგრეთვე მის მიერ ლიზინგით გაცემულ ქონებაზე;

• მეორე - სახელშეკრულებო ვალდებულების შესრულების უზრუნველყოფის ღონისძიების ფარგლებში მიღებულ (დასაკუთრებულ) ქონებაზე;

• მესამე - ფულადი ვალდებულების გადახდევინების ფარგლებში აუქციონის, პირდაპირი მიყიდვის ან სხვა წესით შეძენილ ქონებაზე.

ქონების გადასახადის განაკვეთი საწარმოსთვის/ორგანიზაციისთვის წარმოადგენს დასაბეგრი ქონების ღირებულების არა უმეტეს 1 პროცენტს. დასაბეგრი ქონების ღირებულება კი არის საშუალო წლიური საბალანსო ნარჩენი ღირებულება, რომელიც გამოიანგარიშება კალენდარული წლის დასაწყისისა და ბოლოსთვის აქტივების საშუალო ღირებულების მიხედვით. მაგალითად: თუ წლის დასაწყისში საწარმოს აქტივების საბალანსო ნარჩენი ღირებულება შეადგენს 100 000 ლარს, ხოლო ამავე წლის ბოლოსთვის 150 000 ლარს, ამ საანგარიშო პერიოდის დასაბეგრი ქონების ღირებულება იქნება ამ ორი თანხის ჯამის ნახევარი - 125 000 ლარი, საიდანაც დაითვლება 1% ქონების გადასახადი.

გრანთ თორნთონ საქართველოს უფროსი საგადასახადო კონსულტანტის თქმით, გასათვალისწინებელია ის საკითხი, როდესაც  დასაბეგრი ქონების საბაზრო ფასი აღემატება მის საბალანსო ღირებულებას

„თუ მიმდინარე წელს თქვენი დასაბეგრი ქონების საბაზრო ფასი აღემატება მის საბალანსო ღირებულებას, საგადასახადო ორგანო უფლებამოსილია, შემოწმების შემთხვევაში, დასაბეგრი ქონების ღირებულება განგისაზღვროთ საბაზრო ფასით. ეს მიდგომა არ გამოიყენება მხოლოდ უძრავ ქონებაზე, რომელსაც საწარმო გადაფასების მეთოდის გამოყენებით აღრიცხავს და რომელიც ასახულია აუდირებულ ფინანსურ ანგარიშგებაში. შესაბამისად, საწარმომ ყურადღებით უნდა აკონტროლოს ბალანსზე რიცხული ქონების საბალანსო ღირებულებისა და მისი საბაზრო ღირებულების შესაბამისობა, “- განაცხადა დავით ღავთაძემ.

ვის უწევს მიწაზე ქონების გადასახადი და რაზეა დამოკიდებული ეს თანხა

მიწაზე ქონების გადასახადის გადამხდელი არის პირი საგადასახადო წლის 1 აპრილის მდგომარეობით:

ა) მის საკუთრებაში არსებულ მიწაზე;

ბ) სახელმწიფო საკუთრებაში არსებულ მიწაზე, რომლითაც სარგებლობს ან რომელსაც ფლობს.

მიწაზე ქონების გადასახადის თანხა დამოკიდებულია მის კატეგორიაზე, ფართობზე და საბაზისო განაკვეთებზე, რომლებსაც ადგენს შესაბამისი ტერიტორიული ერთეულების ადმინისტრაციული ორგანოები.

ქონების გადასახადის საანგარიშო პერიოდად ითვლება კალენდარული წელი. დეკლარაციაში მონაცემები დასაბეგრი ქონების შესახებ შეიტანება გასული საგადასახადო წლის მიხედვით, ხოლო დასაბეგრი მიწის შესახებ – მიმდინარე საგადასახადო წლის მიხედვით. მაგალითად: თუ საწარმო ქონების გადასახადის დეკლარაციას წარადგენს 2023 წლის 1 აპრილს, მასში აისახება 2022 წელს ბალანსზე რიცხული ქონების საშუალოწლიური ნარჩენი საბალანსო ღირებულება და 2023 წლის 1 აპრილის მდგომარეობით მფლობელობაში არსებული მიწა.

საწარმო/ორგანიზაცია ქონებაზე გადასახადს იხდის მიმდინარე გადასახდელის სახით 100%-ის ოდენობით, არა უგვიანეს საგადასახადო წლის 15 ივნისისა, ხოლო მიწაზე არა უგვიანეს კალენდარული წლის 15 ნოემბრისა.