ფინანსისტების განცხადებით, სათამაშო ინდუსტრიისთვის დაწესებული აკრძალვები ბიზნესის ნაწილს ჩრდილში გადაიტანს. გარდა იმისა, რომ ქართველი მოთამაშეები უცხო ქვეყნების სახელით ითამაშებენ, დიდი საფრთხეა, რომ არალეგალური საიტები მომრავლდეს. ეკონომიკურ მეცნიერებათა დოქტორის, ანალიტიკოს ნიკა შენგელიას თქმით, ეს პროცესი განსაკუთრებით მაისიდან გახდება შესამჩნევი, როცა ლუდომანები აზარტული თამაშისთვის ალტერნატიულ შესაძლებლობებს გამონახავენ, მათ შორის ყველაზე აქტუალურად არალეგალური საიტების გახსნა განიხილება, რაც არა მარტო საქართველოსთვის, განვითარებული ქვეყნებისთვისაც დიდი პრობლემაა.
როგორც შენგელია ამბობს, მსოფლიოში მრავალი ონლაინკაზინოა, სადაც ნებისმიერ მსურველს შეუძლია შევიდეს და ითამაშოს. შესაბამისად, ადგილი ექნება ქვეყნიდან ფულის გადინებას, რაც ეროვნული ვალუტის კურსზეც ნეგატიურად იმოქმედებს.
,,თებერვლიდან, როცა საიტები ხელმიუწვდომელი გახდება, ცხადია, აქაც გაჩნდება არალეგალური თამაშის შესაძლებლობა, სადაც ჩვენი მოქალაქეები ითამაშებენ. არც თანხის გადარიცხვა იქნება პრობლემა. ნებისმიერ მოქალაქეს შეუძლია გადავიდეს მეზობელ რეგიონში - სომხეთში, აზერბაიჯანში, თურქეთში და სხვა, სადაც ისურვებს, გახსნას ანგარიში და აიღოს ბარათი. ჩვეულებრივ, თუ ჩვენი ბარათებიდან ვერ ხდება ჩარიცხვა, სხვა ტრანზაქციებს ქვეყნების ბარათებით განახორციელებენ. ცუდი ისაა, რომ საქართველოდან ვალუტა გასვლას დაიწყებს უცხოეთში, რაც ლარზე ნეგატიურად იმოქმედებს. უფრო მაისიდან გახდება ეს პროცესი შესამჩნევი, სანამ ალტერნატიული გზები მოიძებნება. განსაკუთრებით ის კატეგორია, ვინც აქამდე აზარტულ თამაშებში დიდ ფასონს დებდა. მაღალგანვითარებულ ქვეყნებსაც გაუჭირდათ სრულად ამ სფეროს კონტროლი. გაჩნდება ბევრი არალეგალური საიტი, რომელზეც დადებენ ფსონებს და ითამაშებენ. რისკი ნამდვილად არის, ამიტომ ასე ხელაღებით აკრძალვა მაინც და მაინც სწორ გადაწყვეტილებად არ მიმაჩნია“, - ამბობს ,,კომერსანტთან“ ნიკა შენგელია.
შეგახსენებთ, რომ აზარტულ და მომგებიან თამაშებთან დაკავშირებული ადმინისტრაციული პასუხისმგებლობა მკაცრდება - შემოდის ახალი სახის ჯარიმები, კანონით გათვალისწინებული ჯარიმების ოდენობა კი, იზრდება.
გარდა ამისა, აზარტული თამაშობის, ტოტალიზატორის, ლოტოს, ბინგოს და მათი ორგანიზატორების შესახებ რეკლამის გავრცელება შეიზღუდება. აკრძალვები შემოდის სატელევიზიო რეკლამის ნაწილში - პროექტის საბოლოო რედაქციით, სატელევიზიო ეთერში რეკლამა, სასპონსორო განცხადება და პროგრამაში პროდუქტის (საქონლის/მომსახურების) განთავსება იკრძალება.
ახალი რეგულაციები 2022 წლის 1-ელი მარტიდან ამოქმედდება.
როგორც სათამაშო ინდუსტრიის წარმომადგენლები აცხადებენ, დაანონსებულმა და ძალაში შესულმა ცვლილებებმა ბაზარზე გავლენა უკვე მოახდინა. მაგალითად, ონლაინკაზინოებიდან თანხის გატანის საკომისიო მომხმარებლისთვის 1%-დან 3%-მდე გაიზარდა, ასევე გართულდა აზარტულ ვებგვერდებზე რეგისტრაცია/ვერიფიკაციის წესები.
მარი ჩიტაია