ეკონომიკისა და მდგრადი განვითარების მინისტრის, ლევან დავითაშვილის განცხადებით, ეროვნულმა ვალუტამ გამყარება დაიწყო, საბოლოოდ დასტაბილურდა და რამდენიმე დღის განმავლობაში, შესაძლოა, კიდევ უფრო გამყარდეს.

მისივე თქმით, დღეს ეკონომიკური პარამეტრები ზუსტად ისეთივეა, როგორც რუსეთ-უკრაინას შორის ომის დაწყებამდე იყო.

დავითაშვილის განცხადებით, ეკონომიკური პროცესები, მათ შორის საქართველოში, პოლიტიკური დაძაბულობით, ისტერიით, ხშირ შემთხვევაში არაობიექტური მოვლენებით, სპეკულაციებით ზიანდება, რაც ლარის კურსზეც აისახება.

„მთელი ეკონომიკური გუნდი მკაფიოდ ვსაუბრობდით, რომ არ არსებობდა ლარის ამგვარი გაუფასურების წინაპირობები. ეს გამოჩნდა კიდეც და მუდმივი კომუნიკაციით ძირითად ბიზნეს-აქტორებთან, საბანკო სფეროს წარმომადგენლებთან, ანალიტიკოსებთან, მოსახლეობასთან ვაჩვენეთ, რომ რეალურად, პანიკა გადაივლიდა, ეროვნული ვალუტის კურსი დასტაბილურდებოდა და ეს ასეც მოხდა.

დღეს თავისუფალი სავაჭრო კურსი გვაქვს და დავინახეთ, რომ ლარმა სტაბილიზაცია, წონასწორობის წერტილის მონახვა დაიწყო. ვფიქრობთ, რომ დღეს ეკონომიკური პარამეტრები ზუსტად ისეთივეა, როგორც ომის დაწყებისას და ომის წინ. გვახსოვს, რამდენად გამყარებული იყო ლარი. შესაბამისად, ეს პარამეტრები არ არის სახეცვლილი. ამ მომენტისთვის, ობიექტურად, კურსი უნდა იყოს დაახლოებით იგივე წონასწორობის მიდამოებში, რაც იყო ომის დაწყებამდე. შესაბამისად, ეს ყველაფერი იყო პანიკური და ალბათ მოლოდინების ეფექტი. ამ შემთხვევაში, შეიძლება ითქვას, რომ მაღალ დონეზე კოორდინაციით ყველა აქტორთან და მათ შორის. იმ გადაწყვეტილებების აღსრულებით, რაც საერთაშორისო თანამეგობრობამ მიიღო იგივე საფინანსო სანქციების კუთხით, ეროვნულ ბანკთან ძალიან მჭიდრო თანამშრომლობით და კავშირით პროცესები დასტაბილურდა, დამშვიდდა", - აღნიშნა ეკონომიკის მინისტრმა.

ლევან დავითაშვილის განცხადებით, მთავრობის და ეროვნული ბანკის ეს უპრეცედენტო მჭიდრო თანამშრომლობა გამოჩნდა და მოსახლეობამ დაინახა, რომ ლარის გაუფასურების წინაპირობები მართლაც არ იყო, რის შედეგადაც ეროვნული ვალუტის კურსი დასტაბილურდა.

რაც შეეხება ეროვნული ბანკის ინტერვენციას - მინისტრის განმარტებით, ბანკმა საკმაოდ მნიშვნელოვანი თანხით მიიღო აუქციონში მონაწილეობა, მაგრამ რეალურად, ის სრულად ათვისებული არ იყო, რადგან ამ პირობებს ობიექტური წანამძღვრები არ ჰქონდა.