„დაჭრილ, გაყინულ ბოსტნეულის და დარჩეულ, გასუფთავებულ მწვანილის მწარმოებელი კომპანია „შინაო“, რამდენიმე თვეში გაყინულ ხილსაც გამოუშვებს“ - ამის შესახებ „კომერსანტს“ შპს “შინაოს“ კომერციულმა დირექტორმა გიორგი ქვრივიშვილმა უთხრა.
მისივე თქმით, კომპანია ქართულ ბაზარზე დაახლოებით რვა თევა ოპერირებს და მომხმარებელს საქართველოში მოყვანილ მწვანილს და ბოსტნეულს გარჩეულ-გასუფთავებული სახით სთავაზობს.
„გაყინული ხილი დღეს ქართულ ბაზარზე არის, თუმცა ძირითადად იმპორტირებულია. ჩვენ მომხმარებელს ქართველი ფერმერების მიერ მიყვანილ ხილს შევთავაზებთ. ახალ წლამდე გვექნება შეფუთული გაყინული ხილი როგორც ცალკეული ხილი სახეობის მიხედვით, ასევე მომხმარებელს სხვადასხვა ხილის მიქსსაც შევთავაზებთ. ასორტიმენტში გვექნება ატამი, ნესვი, მარწყვი, ქლიავი, ბალი და სხვა. თითქმის ყველაფერი რაც ჩვენთან მოდის“, - აღნიშნა გიორგი ქვრივიშვილმა.
კომპანიამ თავდაპირველად დაჭრილი კარტოფილით დაიწყო ოპერირება, თუმცა დღეს მომხმარებელს სტაფილოს, ჭარხალს, ყვავილოვან კომპოსტს, ბროკოლის, სხვადასხვა ბოსტნეულსა და მწვანილეულს სთავაზობს.
„ჩვენ დაახლოებით 6 თვეა რაც ასორტიმენტი გავაფართოვეთ. თავიდან დავიწყეთ მხოლოდ გაყინული კარტოფილით. დღეს გვაქვს კარტოფილი, სტაფილო, ჭარხალი, ყვავილოვანი კომბოსტო. ეს რაც შეეხება სათითაო შეფუთვებს, ასევე გვაქვს მიქსები სადაც ერთმანეთში შერეულია ბროკოლი, კარტოფილი და სტაფილო.
გვაქვს ერთი მიქსი ბროკოლითა და ყვავილოვანი კომბოსტოთი, ასევე ჭარხალი და ყვავილოვანი კომპოსტო. ასევე გვაქვს გაყინული გოგრაც. გაყინული ბოსტნეულის გარდა გვაქვს მწვანილეულობა, თითქმის ყველაფერი, ნიახური, ქინძი, სსალათის ფურცლები, ხახვი და სხვა. სეზონურად გვაქვს რეჰანი, კამა და წიწმატი“, - აღნიშნა გიორგი ქვრივიშვილმა
ქვრივიშვილი „კომერსანტთან“ საუბრისას აღნიშნავს, რომ “შინაოსთვის“ პრობლემას არ წარმოადგენს ადგილმდებარეობა და ქართველი გლეხების მიერ მოყვანილ პროდუქციას თითქმის საქართველოს ყველა წერტილიდან იბარებს. მაგალითად მწვანილი წყალტუბოდან, გეგუთიდან და მისი შემოგარენიდან ჩამოაქვს. რადგან როგორც თვითონ ამბობს დასავლეთში მოყვანილი მარნეულისას და გარდაბნისას ჯობია.
გიორგი ქვრივიშვილის თქმით, „შინაოს“ პროდუქცია იყიდება უბნის არაბენდირებულ მაღაზიებში. გარდა ამისა მისი შეძენა შესაძლებელია „დეილის“ ქსელურ სუპერმარკეტში, რომელიც დასავლეთ საქართველოშია წარმოდგენილი და “მაგნიტის“ მაქს ფილიალებში.
„მოლაპარაკებები გვაქვს სხვადასხვა ორგანიზაციებთან და გაფართოებას ვცდილობთ. რვა თვეა დაახლოებით რაც ესე სტაბილურად დავიწყეთ დისტრიბუცია და ჩვენი დისტრიბუცია მთელ საქართველოს მოიცავს, არ აქვს მნიშვნელობა ბათუმიდან მოინდომებს ვინმე ჩვენთან თანამშრომლობას, კახეთიდან თუ სხვა ქალაქიდან“ - აღნიშნა გიორგი ქვრივიშვილმა.
კომპანია „შინაოს“ საწარმო ფონიჭალაში მდებარეობს. გიორგი ქვრივიშვილის თქმით, პროდუქციაზე მოთხოვნა მზარდი დინამიკით გამოირჩევა.
„სექტემბრიდან ისეთი სეზონია მწვანილები, ბოსტნეული ილევა და შესაბამისად იზრდება მოთხოვნა, როგორც მწვანილზე ისე გაყინულ პროდუქციაზე“ - აღნიშნა გიორგი ქვრივიშვილმა.
რაც შეეხება ინვესტიციას კომპანიამ დანადგარების შესაძენად usaid-ის გრანტით ისარგებლა. გარდა ამისა, პროექტში დამფუძნებლების და ბიზნესის პირადი ინვესტიციაც განხორციელდა. შპს „შინაო“ დღეის მდგომარეობით 20 ადამიანს ასაქმებს.
თაკო კვაჭანტირაძე