რესტორატორთა ასოციაციის დამფუძნებელი შოთა ბურჯანაძე ითხოვს, რომ „მწვანე ზონის“ შემქმნელი რესტორნები დაწესებული შეზღუდვებისგან გათავისუფლდნენ.

მაგალითად, მისი თქმით, სტუმარმა თავად უნდა გადაწყვიტოს, როდის მივა და წავა სოციალური დასვენების ობიექტიდან.

„„მწვანე ზონები“ არავის წინააღმდეგ მიმართული ქმედება არ არის. ანუ იგულისხმება - ადამიანების უსაფრთხოდ შეკრება. ეს არავის დისკრიმინაცია არაა. იდეა იქიდან მომდინარეობს, რომ სოციალური დასვენების ადგილებში ადამიანებმა თავი უსაფრთხოდ იგრძნონ. ამ შემთხვევაში მოთხოვნაა აცრა, ან ბოლო 72 საათში PCR ტესტის, ან ბოლო 24 საათში სწრაფი ტესტის უარყოფითი პასუხი. ჯანდაცვის სამინისტროს ეს გადაწყვეტილება რესტორნებს შესაძლებლობას მისცემს, ეტაპობრივად გამოვიდნენ იმ პრობლემებიდან, რის წინაშეც ახლა დგანან.

თუ რესტორანი მიიღებს გადაწყვეტილებას, რომ მწვანე ზონად დაფიქსირდეს, ამ შემთხვევაში მას რეგულაციების გარეშე ოპერირების საშუალება უნდა მიეცეს. ანუ უნდა მოიხსნას ის შეზღუდვები, რაც დღეს სარესტორნო სფეროსთვის არის დაწესებული“,- აღნიშნა შოთა ბურჯანაძემ.

მისი თქმით, „მწვანე სისტემის“ წარმატებით განხორციელების შემთხვევაში, ქორწილების, ივენთების და სხვა ღონისძიებების გამრთვაც იქნება შესაძლებელი.

„გარდა ამისა, დღეს აკრძალულია ისეთი ღონისძიებები, როგორიცაა ივენთები, ქორწილები და ა.შ. თუ ეს მწვანე სისტემა განხორციელდა, ბიზნესმა, საზოგადოებამ და ხელისუფლებამ გარკვეულწილად სწორი ნაბიჯები გადადგეს, ამ შემთხვევაში თავისუფლად შეიძლება გაიმართოს ეს ღონისძიებებიც“,- აცხადებს შოთა ბურჯანაძემ.

შოთა ბურჯანაძის განცხადებით, ზოგიერთი რესტორანი „მწვანე ზონის“ შექმნის იდეას უყურებს, როგორც ფინანსური პრობლემების შექმნას, რადგან ამ ეტაპზე ქვეყანაში ბევრი აცრილი არ არის.

„ისინი ფიქრობენ, რომ მომხმარებელი მოაკლდებათ. ჩვენი მოთხოვნა იყო საშემოსავლოს გარკვეული ვადით შემცირება ან მოხსნა. ეს პრეცედენტი უკვე არსებობდა ჩვენს რეალობაში. აქედან გამომდინარე, ეს გადაწყვეტილება სახელმწიფოსთვის რთული არ უნდა იყოს“,- აღნიშნა შოთა ბურჯანაძემ.

business-partner.ge