შრომის ინსპექციამ 2022 წელს 1000-მდე სამშენებლო ობიექტის შემოწმება მოახდინა და რიგი დარღვევების გამო უწყებამ საკუთარი მანდატი გამოიყენა და საჯარიმო სანქციები აამოქმედა.

როგორც „კომერსანტთან“ შრომის ინსპექციის სამსახურის უფროსის მოადგილემ მაია მიქაიამ განაცხადა, ჯარიმების მოცულობა დამოკიდებულია სამშენებლო კომპანიის ბრუნვის მოცულობაზე და მის ოდენობა განისაზღვრება კომპანიის ბრუნვიდან გამომდინარე და თითო დარღვევაზე 100-დან 1000 ლარამდეა.

ხოლო რაც შეეხება იმ სამშენებლო კომპანიებს, სადაც შრომის ინსპექციამ კრიტიკული შეუსაბამობა დააფიქსირა, მოახდინა მათი სამუშაო პროცესის შეჩერება და მათზე საქმიანობის შეჩერების გადაწყვეტილება მიიღო. თუმცა მაია მიქაიას თქმით, რიგმა სამშენებლო კომპანიებმა მოახერხეს შეუსაბამობის გამოსწორება და მათ დიდი ნაწილს საქმიანობის გაგრძელებაზე შრომის ინსპექციის შესაბამისი ნებართვა უკვე აქვთ.

„რაც შეეხება ზოგადად ინსპექტირების პროცესს ის მთელი საქართველოს მასშტაბით ხორციელდება და ჩვენ ვახორციელებთ როგორც გეგმურ ასევე არაგეგმურ ინსპექტირებებს.

დარღვევების რაოდენობა და კლასიფიცირება არის სხვადასხვაგვარი. თუ ჩვენ ვსაუბრობდით 2021 წელს დამსაქმებელს არ ჰქონდა საფრთხეების რისკების და იდენტიფიცირების დოკუმენტი, დღეს ეს დოკუმენტი ობიექტზე არსებობს, თუმცა გარკვეული ხარვეზები აქვს. ჩვენი მითითებების ფარგლებში კი ზუსტად ვეუბნებით თუ რა როგორ უნდა გამოასწორონ.

2022 წელს არის გაზრდილი იმ ობიექტების რაოდენობა და პროცენტულად ზრდის კარგი ტენდენცია გვაქვს, იმ ობიექტების რომლებმაც პირველივე მითითების, გაფრთხილების შემდეგ სრულად გაითვალისწინეს სამსახურის რეკომენდაციები. რაც მეტყველებს იმაზე, რომ შრომის უსაფრთხოების ნორმების დაცვა, ნელ-ნელა ხდება დამსაქმებლის ყოველდღიური რეჟიმის ამსახველი“,- განმარტავს შრომის ინსპექციის სამსახურის უფროსის მოადგილე.

როგორც ცნობილია, შრომის უსაფრთხოების შესახებ ორგანული კანონი უკვე 2019 წლიდან ეხება ყველა ეკონომიკური საქმიანობის განმახორციელებელ სუბიექტს. შესაბამისად დამსაქმებლები ვალდებულნი არიან დაიცვან ის მოქმედი რეგულაციები, რომელიც არსებობს კანონით და სხვა ტექნიკური რეგლამენტებით.

„შემოწმების პროცესი ინსპექტორების მხრიდან ყოველდღიურ რეჟიმში ხორციელდება და მოწმდება ყველა ეკონომიკური საქმიანობა, მათ შორის სამსახურის წარმომადგენლები ზედამხედველობას ახორციელებენ სამშენებლო სექტორზეც. დაახლოებით 1000-მდე სამშენებლო ობიექტის შემოწმება, მონიტორინგი განხორციელდება 2022 წელს. შესაბამისად მნიშვნელოვნად არის გაზრდილი იმ ობიექტების რაოდენობა, რომელთაც პირველსავე გაცემული მითითებების შესრულების შედეგად მოახდინეს გამოსწორება იმ დარღვევების, რომელიც ფიქსირდებოდა. ბუნებრივია ეს პროცესი არის მნიშვნელოვანი“, - განმარტავს შრომის ინსპექციის სამსახურის უფროსის მოადგილე.

მაია მიქაიას ამბობს, რომ 2022 წელსაც უბედური შემთხვევების რაოდენობის კლება დაფიქსირდა.

„ასევე მნიშვნელოვანია უბედურ შემთხვევათა სტატისტიკური მდგომარეობაც. შრომის ინსპექციის ანგარიში მალე გამოქვეყნდება და იქაც ნახავთ, მაგრამ წინსწრებით შემიძლია გითხრათ, რომ უბედური შემთხვევების სტატისტიკაში არის კლება და ეს კლების ტენდენცია წლებთან ერთად მყარდება“, - აცხადებს მიქაია.