საქართველოს უმსხვილესი საიმპორტო სასაქონლო ჯგუფი 2022 წლის იანვარ-სექტემბერში წარმოდგენილი იყო მსუბუქი ავტომობილების სახით, რომლის იმპორტმა 1 086.2 მლნ. აშშ დოლარი და მთელ იმპორტის 11.4 პროცენტი შეადგინა, ხოლო ექსპორტმა 590.5 მლნ. აშშ დოლარი (მთლიანი ექსპორტის 14.4 პროცენტი). შუა აზიის ქვეყნები კი ბოლო პერიოდში საქართველოსთვის ავტომობილების მნიშვნელოვანი საექსპორტო ბაზარი გახდა.
ავტო-იმპორტიორთა ასოციაციის ხელმძღვანელი ლაშა დარბაისელი „კომერსანტთან“ ამბობს, რომ შუა აზიის რეგიონის მიმართულებით ზრდა სექტორისთვის და საქართველოს ბიუჯეტისთვის ძალიან მომგებიანია.
„ავტომობილების ექსპორტი გაზრდილი არის ყაზახეთის, ყირგიზეთის და ტაჯიკეთის მიმართულებით. ამ ქვეყნებში რეალურად ხდებოდა რუსეთიდან ავტომობილების იმპორტი. როდესაც რუსეთს დაუწესეს სანქციები უკრაინაში წამოწყებული ომის გამო, ისინი ვეღარ ახდენენ შუა აზიის ქვეყნებისთვის ავტომობილების მიწოდებას, ამიტომ ჩვენთან წამოვიდნენ, რადგან აქ ნახეს ალტერნატივა. ჩვენ ჯერ კიდევ 2 წლის წინ ვამბობდით, რომ შუა აზიის რეგიონი იქნებოდა სექტორისთვის და საქართველოს ბიუჯეტისთვის ძალიან მომგებიანი.
ქართველმა ავტო-იმპორტიორებმა ყველაზე დიდი ზარალი მივიღეთ 2019 წელს, როცა დავკარგეთ სომხეთის ბაზარი. უკრაინა, ჩვენთვის ძალიან მნიშვნელოვანი სავაჭრო პარტნიორი იყო, რომელიც გასაგებია, რომ დავკარგეთ რაღაც დროით. არა ამ მასშტაბის, თუმცა გარკვეული პოზიცია ჰქონდა რუსეთის ბაზარზე ავტომობილების ექსპორტსაც, მაგრამ ის მაინც ყოველთვის არასტაბილური და პოლიტიკურ განწყობებზე მიბმულია, რადგან რუსეთში ყველაფერს პოლიტიკური კონტექსტი განსაზღვრავს“, — აღნიშნავს დარბაისელი.
მისი თქმით, აღნიშნული ბაზრის შენარჩუნება ძალიან მნიშვნელოვანია და მოელის, რომ ომის დასრულების შემდეგაც, უფრო მისაღები ფასების და უსაფრთხო გზის გამო ყაზახები და ყირგიზები რუსეთის ალტერნატიული გზის ანუ საქართველოს გავლით მოახდენენ ავტომობილების იმპორტს.
„ყაზახეთის ბაზარზე რეექსპორტი წინა წლებთან შედარებით 3-ჯერ არის გაზრდილი, ტაჯიკეთში 1.5-ჯერ, ყირგიზეთში 2.5-ჯერ, რეალურად მათ საქართველოში რუსეთის ბაზრის ჩანაცვლების ალტერნატივა მონახეს. დარწმუნებული ვარ, არსებული ვითარება ომის დასრულების შემდეგაც შენარჩუნდება, რადგან რუსეთი დამარცხდება და მათ რესურსს ჩვენ ავითვისებთ. ყაზახი იმპორტიორები აღნიშნავენ, რომ ჩვენ მათ უფრო დაბალ ფასში ვთავაზობთ და უფრო უსაფრთხო გზას.
მოთხოვნის ტიპი არ იცვლება, რეექსპორტზე ძირითადად „ჰიუნდაისა“ და ,,ტოიოტას“ მარკის ავტომობილები გადის. ისე როგორც მთელი წლის განმავლობაში, ბოლო ერთ თვეშიც ყველაზე აქტიური ყაზახეთი და შუა აზიის სხვა ქვეყნებია. ჰიბრიდულ ძრავზე მომუშავე ავტომობილებს დიდად არ ითხოვენ ავტონაწილების და ავტოსერვისის ხელმიუწვდომლობის გამო. ჰიბრიდებზე მოთხოვნა უფრო მეტად სომხეთშია“, — ამბობს ლაშა დარბაისელი.
2022 წლის იანვარ-სექტემბერში საქართველოდან 590 მლნ დოლარის მსუბუქი ავტომობილების ექსპორტი განხორციელდა, ზრდა წინა წელთან შედარებით 74.6%-ია, ხოლო იმპორტმა მილიარდს გადააჭარბა, რაც გასულ წელთან შედარებით 59%-იანი ზრდაა.