საქართველო ქართული ღვინის მარკეტინგულ კამპანიას პანდემიურ პერიოდშიც აქტიურად აგრძელებს. ამ მიზნით ერთ-ერთი მნიშვნელოვანი წინგადადგმული ნაბიჯია ,,ქართული ღვინის ფორუმი“, რომელიც ფესტივალის „FERNWEH” ფარგლებში გაიმართა. როგორც ღვინის ეროვნული სააგენტოს თავმჯდომარის მოადგილე დავით ტყემალაძე აცხადებს, ღვინის მარკეტინგი კიდევ უფრო გააქტიურდება გლობალურ ბაზრებზე, მათ შორის, შვეიცარიაში, სადაც უკვე 2022 წელს ღვინის ეროვნულ მუზეუმში საქართველოს საკუთარი სივრცე ექნება, რაც პოპულარიზაციის მიმართულებით ერთ-ერთი სერიოზული ნაბიჯია.

,,წარმოიდგინეთ, რომ ჩვენ პრაქტიკულად ღვინის საელჩო გვაქვს შვეიცარიაში, სადაც ღვინის კულტურაა, აფასებენ ღვინოს და აქვთ ენდემური ჯიშები, ღვინის ფასი იციან! 2022 წელს კი შვეიცარიის ღვინის მუზეუმში ქართული ღვინის ეთნოგრაფიულ-ისტორიული კუთხე მოეწყობა. ღვინის მწარმოებელი ტრადიციული ევროპული ქვეყნების გარემოცვაშია, როგორსაც იტალია და საფრანგეთი წარმოადგენენ. ამ შემთხვევაში ქართული მეღვინეობით დაინტერესება ჩვენთვის მნიშვნელოვანი წინგადადგმული ნაბიჯია. მომავალში იგი მხარს დაუჭერს ციურიხში ახალგახსნილ ქართული ღვინის მაღაზიას და შექმნის საშუალებას, ყველამ იცოდეს, რომ ქართული ღვინო შვეიცარიაში კონკრეტულ ადგილას არსებობს, სადაც ნებისმიერ მსურველს შეუძლია, დააგემოვნოს, დაესწრო დეგუსტაციას და შეიძინოს“, - აცხადებს ,,კომერსანტთან“ დავით ტყემალაძე.

მისი ინფორმაციით, პარალელურად გრძელდება ასევე პროექტი ,,საქართველო - ღვინის სამშობლო“, რომელიც 2017 წელს დაიწყო ბორდოში. შვეიცარია კი აღმოჩნდა ადგილი, სადაც ქართული ღვინო ფეხს იკიდებს და საკუთარ ნიშას ეძებს.

შეგახსენებთ, რომ შვეიცარიის კონფედერაციის დედაქალაქ ბერნში, ფესტივალის „FERNWEH” ფარგლებში, „ქართული ღვინის ფორუმი“ გაიმართა. შვეიცარიაში მსგავსი მასშტაბის ღონისძიება პირველია და ის ქართული ღვინის ცნობადობისა და ექსპორტის გაზრდის ხელშეწყობისთვის განსაკუთრებით მნიშვნელოვანია.

შვეიცარიაში „ქართული ღვინის ფორუმი“ გარემოს დაცვისა და სოფლის მეურნეობის სამინისტროს, ღვინის ეროვნული სააგენტოსა და ტურიზმის ეროვნული ადმინისტრაციის მხარდაჭერითა და შვეიცარიის კონფედერაციაში საქართველოს საელჩოს, „ქართული ღვინის გალერეის“ და შვეიცარიაში „ქართული კულტურის ცენტრის“ ორგანიზებით ჩატარდა.

ქ. ბერნში, ღვინის პროფესიონალებსა და დაინტერესებულ პირებს, ორი დღის განმავლობაში, შესაძლებლობა ჰქონდათ გასცნობოდნენ ქართული კომპანიების მიერ წარმოდგენილ სხვადასხვა დასახელების ღვინოს. საქართველოს გარემოს დაცვისა და სოფლის მეურნეობის სამინისტროსა და ღვინის ეროვნული სააგენტოს მხარდაჭერით, ფორუმში კომპანიები: „თელავის ღვინის მარანი“, „შატო მუხრანი“, „თელიანი ველი“, „შილდა“, GWS, „წინანდლის მამული“, „კონჭო და კომპანია“, „ნაბერაული“ და „ნიკოლაიშვილების ღვინის მარანი“ მონაწილეობდნენ.

ფორუმის ფარგლებში სამეცნიერო-დოკუმენტური ფილმის „საქართველო ღვინის სამშობლო“ ჩვენება გაიმართა.

მარი ჩიტაია