ალეკ ბოლდუინმა სარეკვიზიტო იარაღიდან გასროლით ოპერატორი გალინა ჰასტინგსი მოკლა და რეჟისორი ჯოელ სოუზა დაჭრა, თუმცა, ის მალევე საავადმყოფოდან გამოწერეს. ამ ტრაგედიამ მთელი მსოფლიო შეძრა, თუმცა, სიმართლე ისაა, რომ მძიმე, ხშირ შემთხვევაში სასიკვდილო ინციდენტების გადასაღებ მოედნებზე ათწლეულების მანძილზე ხდება.
სარეკვიზიტო იარაღი, როგორც წესი, არის ჩვეულებრივი საბრძოლო იარაღი, ოღონდ გადაკეთებული. მასში ჩაყენებულია მოწყობილობა წნევის შექმნისთვის და, შესაბამისად, ცარიელი ვაზნებით სროლის დროს ბუნებრივი აალების მისაღწევად. თუ ასეთ იარაღში შემთხვევით მოხვდება საბრძოლო ვაზნა, ამან შესაძლოა მსროლელს ზიანი მიაყენოს. ასე რომ, სავარაუდოდ, შეცდომა იარაღის გადაკეთების დროს გაიპარა, რასაც მსხვერპლი მოჰყვა.
ეს იშვიათობა არაა, იმიტომ რომ დღესაც, გადასაღებ მოედნებზე ნამდვილი იარაღი ხშირად გამოიყენება.
1920 წელს ფილმ Haunted Spooks-ის გადაღების დროს კომიკოსმა ჰაროლდ ლოიდმა აალებული შაშხანა ხელში აიღო, რადგანაც ის სარეკვიზიტო ეგონა, შედეგად აფეთქებამ მას 2 თითი წააცალა.
ნაცისტურ გერმანიაში 1941 წელს გადაიღეს პროპაგანდისტული ფილმი Mein Leben für Irland, რა დროსაც ერთ-ერთმა არტისტმა ფეხი ნამდვილ ნაღმს დააბიჯა, რის გამოც ის და მისი რამდენიმე კოლეგა დაიღუპა. აფეთქება იმდენად შთამბეჭდავი აღმოჩნდა, რომ ის ფილმში შევიდა.
1984 წელს სერიალის Cover Up-ის გადაღების დროს, მთავარი როლის შემსრულებელმა ჯონ ჰექსუმმა „რუსული რულეტკის“ ეპიზოდში ჩახმახს დააჭირა და ამ დროს აღმოჩნდა, რომ რევოლვერში საბოლო ვაზნა იდო.
ერთ-ერთი ყველაზე ცნობილი ტრაგიკული ინციდენტი 1993 წელს მოხვდა. ფილმ Crow-ს გადაღების დროს საყოველთაოდ ცნობილი ბრიუსლის ვაჟი ბრენდონი ასევე რეკვიზიტური პისტოლეტიდან ნასროლი ტყვიით დაიღუპა.
თუმცა, ყველაფერი ბევრად ადრე დაიწყო. კინოსისტორიაში პირველი დაფიქსირებული სასიკვდილო ინციდენტი 1914 წელს მოხვდა, როცა ფილმ Across The Border-ის გადაღების დროს მსახიობი გრეის მაკჰიუ მდინარე არკანზასზე ნავით გადაადგილდებოდა და ნავი მოულოდნელად გადაბრუნდა. ოპერატორმა ოუენ კარტერმა ის გადაარჩინა და ორივე ნაპირზე ამოვიდა, თუმცა, საუბედუროდ, ეს ქვიშის ჭაობი აღმოჩნდა და საბოლოოდ ორივე დაიღუპა.
1984 წელს Pepsi-ს რეკლამის გადაღების დროს პიროტექნიკა ნაადრევად ამუშავდა, რის გამოც მაიკლ ჯექსონმა მე-3 ხარისხის დამწვრობა მიიღო. ამის გამო მან 1,5 მლნ. დოლარის კომპენსაცია მიიღო, თუმცა, როგორც ამბობენ, სწორედ ამ ინციდენტის შემდეგ დაეწყო მას დამოკიდებულება ტკივილგამაყუჩებლებზე და პლასტიკური ოპერაციების ავადმყოფური აკვიატება.
კინემატოგრაფის ისტორიაში ერთდროულად ყველაზე მეტი ადამიანი 1989 წელს ინდური სერიალის The Sword Of Tipu Sultan-ის გადაღების დროს დაიღუპა. გადაღების დროს 63 სტატისტი და ტექნიკური თანამშრომელი ცეცხლმოდებულ ოთახში სრულიად მოულოდნელად ჩაკეტილი აღმოჩნდა და ყველა დაიღუპა.
სიკვდილიანობა და მძიმე დაზიანებები ყველაზე ხშირია კასკადიორებს შორის . 1941 წელს ფილმ They Died with Their Boots On-ში კავალერიული შეტევის გადაღების დროს 3 კასკადიორი დაიღუპა.
საშინელი ტრაგედია დატრიალდა 1982 წელს ფილმ Twilight Zone: The Movie-ის გადაღებისას, როდესაც ვერტმფრენზე არასწორად დამონტაჟებული აფეთქების იმიტაციის მოწყობილობის ამოქმედების შედეგად 3 ადამიანი დაიღუპა, მათ შორის 6 წლის გოგოდა 7 წლის ბიჭი.
წყარო: welt.de
ავტორი თენგიზ აბლოთია