რამდენიმე წისქვილკომბინატი უკვე ფიქრობს, რომ ბიზნესი დახუროს, - ამის შესახებ „კომერსანტთან“ საუბრისას ხორბლისა და ფქვილის მწარმოებელთა ასოციაციის აღმასრულებელმა დირექტორმა ლევან სილაგავამ განაცხადა. მწარმოებლებს პრობლემები მას შემდეგ განუახლდათ, რაც გასული წლის მსგავსად, რუსეთმა ხორბლის საექსპორტო ბაჟის ზრდა დაიწყო, რის ფონზეც საქართველოში ხორბლის იმპორტს აზრს ეკარგება და ფქვილის იმპორტი იზრდება.
ასეთ ვითარებაში კი წისქვილკომბინატები გაჩერებულია, ბიუჯეტში სათანადო გადასახადები არ შედის და იმავდროულად ხორბლის გადამუშავებისას წარმოქმნილი ნარჩენები, რომელიც შემდგომ მეცხოველეობაში გამოიყენება, აღარ იწარმოება. შესაბამისად იზრდება ცხოველების გამოსაკვებად საჭირო პროდუქციის იმპორტიც. არის კიდევ ერთი მთავარი გამოწვევა, დასაქმებულთა რაოდენობის შემცირება, რაზეც მინიშნებები უკვე ღიად კეთდება.
ლევან სილაგავა „კომერსანტთან“ ამბობს, რომ „მეორე ტალღაზე წისქვილ-კომბინატების უმეტესობა მუშა-მოსამსახურეებს გაუშვებს, რადგან „წელს ამის რესურსი უკვე აღარ არსებობს“.
„რამდენიმე წისქვილკომბინატი უკვე ფიქრობს, რომ მთლიანად დაშალოს წისქვილკომბინატი, იმიტომ, რომ აზრი აღარ აქვს - ბიზნესი დახუროს. არ დავასახელებ, თუმცარამდენიმე წისქვილკომბინატის მხრიდან მიდის საუბარი იმაზე, რომ აქვთ ის მიმართულება, რომ წისქვილი დაშალონ.
წლებია ამაზე მიდის საუბარი და რეალურად პრობლემის გადაწყვეტა ვერ ხდება. წისქვილების ნაწილი უკვე თვლის, რომ ამ ბიზნესში მუშაობას აზრი აღარ აქვს. ის, რომ მუშა-მოსამსახურეებს, გაჩერებული წისქვილის პირობებშიც, თავიანთი პასუხისმგებლობიდან გამომდინარე, ხელფასს უხდიან, ცხადია, ეს დიდხანს ვერ გასტანს. საუბარია ბაზრის მსხვილ მოთამაშეებზე, რომლებიც უკვე დაფიქრდნენ იმაზე, რომ ამ ბიზნესს აზრი აღარ აქვს. ფაქტობრივად სტატუს კვოში ვართ, რაც შარშანდელი მდგომარეობა იყო. ჩვენი პროგრამა შეთავაზებული იყო და ამ პროგრამაზე გამოხმაურება იყო თითქოს დადებითი, თუმცა ამის იქეთ ისევ ვერ წავედით, ისევ ისე ვართ და ისევ დაიძრა ფქვილის იმპორტი“- განმარტავს სილაგავა.
ხორბლისა და ფქვილის მწარმოებელთა ასოციაციის აღმასრულებელი დირექტორი არსებული კრიზისიდან გამოსავალის გზებზეც საუბრობს და განმარტავს, რომ შესაძლებელია ფქვილის იმპორტზე კვოტირების დაწესება.
„ჩვენ შეგვიძლია კიდევ ერთი წინადადება შევთავაზოთ, რომ შემოიღონ ფქვილის იმპორტის კვოტირება. ქვეყანას ორიენტაცია აქვს, რომ პურის ფასი შეინარჩუნოს. შესაბამისად, კი ბატონო, თუ ჩვენი პროგრამა მისაღები არ არის, ამოცანა იყო პურის ფასის შენარჩუნება და ამის ვალდებულებას ვიღებდით, თუ შემოვიდოდა სარკისებური გადასახადი, ჩვენ ფქვილის მიწოდების მხრივ, იმ რაოდენობას, რომელიც სჭირდებოდა სოციალურ პურს, მივაწოდებდით ფიქსირებულ ფასად პურის ქარხნებს, რომ ფართო მოხმარების პური არ გაძვირებულიყო. ყველა იძახდა, რომ კარგი პროგრამაა, სწორია და ფქვილის იმპორტი არ არის ნორმალური. შესაბამისად ეს დროებითია, მაგრამ ხედავთ, რომ ეს დროებითი გრძელდება უკვე დიდი ხანია.
კიდევ არის ერთი გამოსავალი, რაც გულისხმობს იმას, რომ იმ რაოდენობის ფქვილზე, რომელიც საჭიროა სოციალური პურის გამოსაცხობად, სახელმწიფომ კვოტირების სახით, იმპორტირებული ფქვილი წარმართოს პირდაპირ იმ პურის ქარხნებში, რომელიც აცხობენ ყოველდღიური მოხმარების პურს. რადგან ჩვენ არ გვენდობიან, იმ პურზე იმპორტირებული ფქვილი იყიდონ, გამოაცხადონ ტენდერები, ვინც უკეთესი ფასით შემოუტანს პურის ქარხნებს. შესაბამისად, ეს იქნება გარანტია იმისა, რომ მათი პური არ გაძვირდება“, - აცხადებს სილაგავა.
ლევან სილაგავას თქმით, წისქვილკომბინატები თებერვლის ბოლომდე არსებული ფასებით უზრუნველყოფენ ფქვილის მიწოდებას.
„თებერვლის ბოლომდე მივაწვდით ამ ფასად ფქვილს და ამის მერე წისქვილების ნაწილი ალბათ ფქვილის შემოტანაზე გადავლენ. ყველა წისქვილკომბინატი უკვე გაჩერების რეჟიმშია“, - ამბობს სილაგავა.