სილიკონის ველის მოსახლეობა, სადაც კონცენტრირებულია მსოფლიოს წამყვანი ტექნოლოგიური კომპანიების სათავო ოფისები, ბოლო 17 წლის განმავლობაში პირველად იკლებს.
ამერიკული ანალიტიკური კომპანია Joint Venture Silicon Valley-ის ინფორმაციით, 2021 წელს ამ ველის მოსახლეობა 1%-ით შემცირდა 3,07 მლნ-მდე, არადა ბოლო 17 წელია რეგიონის მოსახლეობა საშუალოდ 0,7%-ით იზრდებოდა.
ორგანიზაციის ინფორმაციით, ბოლო 3 წელია, რაც რეგიონში მოსახლეობის შემოსვლამ იკლო, მათივე ცნობით გასულ წელს სილიკონის ველი დატოვა 37,9 ათასმა მაცხოვრებელმა, ხოლო დასახლდა 5,5 ათასი. ეს კი სამჯერ ნაკლებია 2020 წლის მაჩვენებელზე და 72%-ით ნაკლები 2019-ზე, როცა 14,9 და 19,9 ათასი ადამიანი დასახლდა. ამასთან, გასულ წელს იმიგრანტების რაოდენობამ 2,9 ათასი შეადგინა, რაც 64%-ით ნაკლებია 2020-ის მაჩვენებელზე.
ორგანიზაციაში ამას დონალდ ტრამპის მიერ შეცვლილ საიმიგრაციო პოლიტიკას და კოვიდ-პანდემიის დროინდელ შეზღუდვებს უკავშირებენ.
ამასთან, როგორც ირკვევა, ისინი ვინც ტოვებენ სილიკონის ველს, ძირითადად გადადიან კალიფორნიის სხვა ქალაქებში და ძალიან იშვიათად ნიუ-იორკში, ოსტინში, პორტლენდსა და სიეტლში.
გარდა ამისა, სილიკონის ველში 2021 წელს 1979 წლის შემდეგ შობადობის ყველაზე დაბალი მაჩვენებელი დაფიქსირდა, ხოლო სიკვდილიანობა კოვიდის ხარჯზე გაიზარდა.
მიუხედავად მოსახლეობის კლებისა, რეგიონში არ შემცირებულა ბიზნესის მდგომარეობა და კაპიტალის მოდინება. აქ უმუშევრობის მაჩვენებელი 2,9%-ია, შეიქმნა დამატებით 15 ათასი ახალი სამუშაო ადგილი. რეკორდულია რეგიონის ვენჩურული დაფინანსების მაჩვენებელი - 95 მლრდ დოლარი. ხოლო აქ განთავსებული კომპანიების ჯამური კაპიტალიზაცია 14 ტრილიონ დოლარს აღემატება.
შეგახსენებთ, რომ მსოფლიო მნიშვნელობის მაღალტექნოლოგიური ინდუსტრიული ზონა – სილიკონის ველის (Silicon Valley) ტექნოპარკი – აშშ-ში, კალიფორნიის შტატში, სან-ფრანცისკოს სამხრეთ-აღმოსავლეთით მდებარე სანტა-კლარას ველის აღმნიშვნელი ჟურნალისტური კლიშეა. სახელწოდება უკავშირდება პირველ ნახევარგამტარებსა და ელექტრონულ ტექნიკას, რომელიც ფუძეშრედ კაჟისგან მიღებულ ნაერთს – სილიციუმს იყენებს. ტერმინი „სილიკონის ველი” კალიფორნიელმა მეწარმემ რალფ ვერსტმა მოიგონა, ხოლო მისმა მეგობარმა, ჟურნალისტმა დონ ჰოფლერმა, პირველმა გამოიყენა საჯაროდ 1971 წლის 11 იანვარს – თავისი სტატიების ციკლს ყოველკვირეულ ჟურნალ Electronic News-ში მან Silicon Valley USA უწოდა. ამ სტატიებში ჰოფლერი წერდა სანტა-კლარას შესახებ, სადაც თავმოყრილი იყო უდიდესი IT-კომპანიების შტაბ-ბინები. სწორედ ამ ველზე მდებარეობს ნახევარგამტარების ინდუსტრიის ძირითადი საწარმოები, ხოლო ინტეგრალური მიკროსქემების ნახევარგამტარების ელემენტების ძირითადი მასალა სწორედ სილიკონია.
ოდესღაც სასოფლო-სამეურნეო რაიონში, ამჟამად გაშენებულია მრავალი ქალაქი, რომლებიც ჯაჭვივით არის გადაჭიმული სან-ფრანცისკოს ყურედან ქალაქ სან-ხოსემდე. მათ წარმოშობას სათავე დაუდო პალო-ალტოში მდებარე სტენფორდის უნივერსიტეტმა, სადაც 1940-იანი წლებიდან ტარდებოდა კვლევები ელექტრონიკის სფეროში. ელექტროგამომთვლელი მანქანების პირველი დიდი ქარხანა სან-ხოსეში 1956 წელს გახსნა ფირმა IBM-მა. სილიკონის ველი მაღალტექნოლოგიური მრეწველობის (განსაკუთრებით – რადიოელექტრონული და რაკეტათმშენებლობის) და ცხოვრების მაღალი დონის გამოხატულებაა. 1950 წლამდე სილიკონის ველი განთქმული იყო ქლიავის ბაღებით და მას მსოფლიოს შავქლიავის დედაქალაქს უწოდებდნენ.
„სილიკონის ველი” პირობითი ცნებაა და კარტოგრაფიულად არ აღინიშნება. ამჟამად ის გეოგრაფიულად სანტა-კლარას ველის ჩრდილოეთ, ურბანიზებულ ნაწილს მოიცავს. იგი გადაჭიმულია სან-მატეოსა და პალო-ალტოს შორის. სილიკონის ველზე მდებარე ქალაქებია: კემბელი, ბელმონტი, კუპერტინო, ფრომონტი, ლოს-ალტოსი, ლოს-გატოსი, მენლო-პარკი, პალო-ალტო, სან-ხოსე, სანტა-კლარა, სარატოგა, სანივეილი და სხვ. სილიკონის ველის დედაქალაქად ხშირად არაოფიციალურად სან-ხოსეს მიიჩნევენ.
წყარო: "ბიზნესპრესნიუსი"
სიკილონ ველი
