მომავალი წლიდან მთავრობა შეეცდება სერიოზული სოციალური ცვლილებების გატარებას, რომელიც ქვეყნის სოციალურ-ეკონომიკური განვითარების საწინდარი უნდა გახდეს. ღონისძიებებს შორისაა ონლაინ თამაშების აკრძალვა, სოციალურად დაუცველი მოქალაქეების დასაქმება, წამლების ფასზე კონტროლის გაძლიერება და სხვა, რაც დღემდე დიდ გამოწვევად რჩება ქვეყნისთვის. სპეციალისტები ფიქრობენ, რომ სწორედ ამ საკითხების მოგვარებაზე გადის 2024 წლის არჩევნები ბედი, რომლისთვისაც სამზადისი ფაქტობრივად დაწყებულია.

ექსპერტი სოციალურ და ეკონომიკურ საკითხებში პაატა აროშიძე ,,კომერსანტთან“ აცხადებს, რომ სოციალური საკითხების მიღმა ჩანს პოლიტიკური ფონი და მთავარი გზავნილი, რისთვისაც მთავრობას სოციალურად აქტიური საკითხების გადაწყვეტა სჭირდება. ამდენად, როგორი შედეგითაც  შესრულდება პრემიერის დაპირება, დიდწილად ამაზეა დამოკიდებული მომავალ არჩევნებში მმართველი გუნდის ყოფნა-არყოფნის საკითხიც.

,,მთავარი პრობლემა, რაც ქვეყნის განვითარებას ხელს უშლის, გამოიკვეთა. ეს არის მოსახლეობის მძიმე სოციალური მდგომარეობა, რასაც პანდემია კიდევ უფრო ამძიმებს.

მთავრობაც კარგად ხედავს ამ ხელისშემშლელ პროცესებს, როგორიცაა სოციალურად დაუცველთა რაოდენობის ზრდა, ინფლაცია და სხვა. ეს წარმოშობს ვალდებულებას, რომ სოციალური პროექტების განხორციელებით დაკავდნენ. რეალურად არის გადასადგმელი ნაბიჯები, განსაკუთრებით საყურადღებოა ამ მხრივ ავიღოთ დასაქმების პრობლემა სოციალურად დაუცველებისთვის. ბევრს მიეცემა საშუალება, თვითონვე აირჩიოს დასაქმების სექტორი, ისე რომ არ დაკარგოს შემწეობის თანხა.  ხშირ შემთხვევაში არ თანხმდებოდნენ სამუშაოს, რადგან ფულადი დახმარების  დაკარგვის ეშინოდათ, გარდა ამისა, საკუთარი შესაძლებლობების რეალიზებას ვერ ახდენდნენ. 2022 წლიდან სწორედ ამ საკითხების მოგვარება იგეგმება, რათა დაასაქმონ სოციალურად დაუცველი მოქალაქეები, ვისაც თუნდაც მინიმალური განათლება აქვს ან გადამზადებას შეძლებს“, - ამბობს აროშიძე.

ერთ-ერთ მნიშვნელოვან საკითხად, რომლის განხორციელებაც იგეგმება, ექსპერტი სათამაშო ბიზნესის საკითხს მიიჩნევს, რაზეც ირიბად ქვეყნის მოსახლეობის კეთილდღეობა და სტაბილურობა არის დამოკიდებული.

,,ონლაინ თამაშების შეზღუდვა სოციალური საკითხების მოგვარებასაც მნიშვნელოვნად შეუწყობს ხელს, რადგან იგი მოსახლეობის გაღარიბების ერთ-ერთ მიზეზად არის აღიარებული.  ის, ვინც დაბალშემოსავლიანია, ონლაინ ან ცოცხალ კაზინოებს თამაშობს იმ იმედით, რომ გაზრდის შემოსავალს და სინამდვილეში ლამის გაკოტრებამდე მიდის, მისი ისედაც მწირი შემოასვალი იფლანგება. მართალია, ზოგიერთი საუბრობს, რომ ამით ტურიზმი დაზარალდება, რაც არ მიმაჩნია სწორი, სჯობს ტურიზმი სხვა მიმართულებით განვავითაროთ, ვიდრე ეს სათამაშო ბიზნესია. აუცილებელია საკანონმდებლო ცვლილება, რომელიც ამ პრობლემის მოგვარების რეალურ შესაძლებლობას მოგვცემს.

ჩავთვალოთ, რომ უკვე დაწყებულია მზადება 2024 წლის არჩევნებისთვის. საჭიროა სიახლის შეთავაზება საზოგადოებისთვის, ეს არის ობიექტური აუცილებლობა. პრობლემის მოგვარებისადმი ოპტიმიზმის გამოჩენა არაფრის მომცემია, თუ კონკრეტული ნაბიჯები არ გადაიდგმება.  საბოლოოდ ისეთი გარემო უნდა ჩამოყალიბდეს, რომელიც ბიზნესის განვითარებას შეუწყობს ხელს, სახელმწიფო არ არის პირდაპირი დამსაქმებელი, ბიზნესმა უნდა აიღოს საკუთარ თავზე“, - აცხადებს პაატა აროშიძე ,,კომერსანტთან“ და დასძენს, რომ ერთ-ერთი შემაფერხებელი გარემოება, რაც სოციალური პროექტების განხორციელებას ხელს შეუშლის, შეიძლება პანდემია გახდეს.  კერძოდ, რამდენად შესაძლებელი იქნება მართვა ლოკდაუნების გარეშე.

მეცნიერის მტკიცებით, პრემიერ-მინისტრის დაპირება დიდი ალბათობ შესრულებადია, რადგანაც სწორედ ამაზე გადის საზოგადოების ნდობის ხაზი, ხოლო იმედგაცრუებამ შეიძლება მისი იმიჯი საბოლოოდ შეიწიროს.

შეგახსენებთ, რომ საქართველოს მთავრობა ონლაინ კაზინოების მუშაობის წესების გამკაცრებას აპირებს. რემიერ-მინისტრ ირაკლი ღარიბაშვილის თქმით, ყოველწლიურად ქვეყნიდან ონლაინ კაზინოების მეშვეობით 1,5 მილიარდი ლარი გაედინება.

პირველ ეტაპზე ირაკლი ღარიბაშვილი ასაკობრივი შეზღუდვისა და რეკლამის აკრძალვის ინიციატივით გამოდის, ხოლო მეორე ეტაპზე, პრემიერ-მინისტრის თქმით, ონლაინ კაზინოები საერთოდ უნდა აიკრძალოს. მისივე თქმით, მთავრობა ამ საკითხზე აქტიურად იმუშავებს პარლამენტთან.

რაც შეეხება დასაქმების საკითხს, ვიცე-პრემიერის ლევან დავითაშვილის განცხადებით, 200 000 სოციალურად დაუცველი მოქალაქე დასაქმდება.

მარი ჩიტაია