ბავშვთა სათამაშოების და სუვენირების მწარმოებელი სოციალური საწარმო ,,დადარი“ მომავალი წლიდან გერმანიაში ერთ-ერთ კერძო საბავშვო ბაღთან ხელშეკრულებას გააფორმებს. ახალი კონტრაქტი ქართულ ბრენდს წარმოების 4-ჯერად ზრდაში დაეხმარება, შესაბამისად საწარმოში სამუშაო ადგილების ზრდასაც შეუწყობს ხელს.
აღსანიშნავია, რომ ,,დადარი“ ,,2021 წლის სოციალური საწარმოს“ ტიტულის მფლობელია. ეკოლოგიურად სუფთა, უმაღლესი ხარისხის ხელნაკეთ ხის სათამაშოებზე შეზღუდული შესაძლებლობის მქონე ადამიანები მუშაობენ. მათ ნახელავზე მოთხოვნა უკვე არა მხოლოდ საქართველოში, არამედ ევროპის ქვეყნებსა და ამერიკაშიცაა.
სათამაშოების გარდა, საწარმოში სუვენირები და სამშვენისები მზადდება. ყველა ძირითადი სამუშაო ხელით სრულდება.
საწარმოს მენეჯერის თეო გეთიაშვილის თქმით, გერმანიაში ექსპორტის გაზრდის შემთხვევაში, წარმოება მასიურ სახეს მიიღებს და რამდენიმე ადამიანის დასაქმების შესაძლებლობაც ექნება.
,,ჩვენი სათამაშოები ხელნაკეთი და მაღალი ხარისხისაა, აბსოლუტურად უსაფრთხო. ვიყენებთ სერტიფიცირებულ საღებავებს, რომელიც სპეციალურად ხის სათამაშოებისთვის არის განკუთვნილი. ხარისხი გადამწყვეტია, რაც ინტერესს იწვევს როგორც საქართველოში, ასევე პოპულარულია ევროპელ მომხმარებელშიც. იქიდან გამომდინარე, რომ სოციალური საწარმოს სტატუსი გვაქვს, დასაქმებული 17 ადამიანიდან 5 სპეციალური საჭიროების მქონე, 5 კი ოკუპირებული რეგიონებიდან იძულებით გადაადგილებული პირია. თავდაპირველად, როცა საქმიანობას ვიწყებდით, მთავარი მოტივაცია გახდა უხარისხო სათამაშოების დიდი ბაზარი, რა მხრივაც პრობლემა დღესაც მასშტაბურია. ვცდილობთ, ამ საკითხის მოგვარებაში ჩვენი მოკრძალებული წვლილიც შევიტანოთ და ამავე დროს შშმ პირებიც დავასაქმოთ. ამ ეტაპზე გვაქვს მოლაპარაკება გერმანიაში ერთ-ერთ კერძო ბაღთან, შესაბამისად, პროდუქციის მიწოდებას 2022 წლიდან დავიწყებთ, რაც წარმოების 4-ჯერადად გაზრდის შესაძლებლობას მოგვცემს. შესაბამისად, დასაქმებულთა რაოდენობასაც გავზრდით“, - ამბობს თეა გეთიაშვილი ,,კომერსანტთან“.
რაც შეეხება პანდემიური პერიოდის გავლენას, ,,დადარის“ მენეჯერის ინფორმაციით, 6 თვის განმავლობაში საწარმო დაკეტილი იყო და გაყიდვებს ახდენდა ონლაინ, რაც პრობლემის დაძლევაში დაეხმარა. საბოლოოდ კი ნამუშევრების ასორტიმენტი გაფართოვდა.
ცნობისთვის, სოციალური საწარმო ,,დადარი“ 2018 წელს შეიქმნა. თავდაპირველი საინვესტიციო თანხა 10 000 ლარია, რაც მუდმივად მატულობს, საწარმოო პროცესის ზრდის და ტექნოლოგიური გადაიარაღების შესაბამისად.
სათამაშოების საწყისი ფასი 14 ლარია. ყველაზე ძვირი ნამუშევარი საშობაო სათამაშოების ნაკრები - შობის სცენა, 17 ფიგურისგანაა დამზადებული და მისი ღირებულება 710 ლარს შეადგენს.
მარი ჩიტაია