პანდემიამ ყველაზე მეტად ღარიბები დააზარალა. სოციალური უთანასწორობა 2021 წელს უფრო მეტად გაღრმავდა და სიტუაციის გაუმჯობესების ნიშნები ჯერჯერობით არ ჩანს. ამ მხრივ ეკონომიკურმა ზრდამ მინიმალურ დონეზეც ვერ მოახდინა გავლენა და ოჯახების კეთილდღეობაზე ისევ ვერ აისახა, როგორც  პანდემიამდე იყო.

ექსპერტი ეკონომიკურ და სოციალურ საკითხებში პაატა აროშიძე ფიქრობს, რომ კორონავირუსის გავლენა მოსახლეობის თითქმის ყველა ფენაზე ნეგატიურად აისახა და განსაკუთრებით ღარიბებს შეეხო, ვინაიდან მათი ისედაც მწირი შემოსავალი შემცირდა, ხოლო საშუალო ფენა თითქმის აღარ დარჩა ქვეყანაში, მათი ნაწილი გაღარიბდა.

,,საქართველოსთვის საშუალო ფენა პირობითი მცნებაა, ძირითადად შედარებითია. ამ ჯგუფს შეიძლება მივაკუთვნოთ ის პირი, რომლის შემოსავალი, ვთქვათ 1500 ლარია, რომ გადავიანგარიშოთ, 500 დოლარიც კი არ არის, ხოლო ნებისმიერ განვითარებულ ქვეყანაში ასეთი შემოსავალი სიღარიბის მაჩვენებელია. პანდემიამ განსაკუთრებით გამოიწვია ის, რომ შემოსავლები შემცირდა, ამას დაემატა ინფლაცია და მოსახლეობის მსყიდველობითუნარიანობის კლება. ის შემოსავალი, რაც ადამიანს  გააჩნდა 2019 წელს, ანუ პანდემიამდე, ინფლაციის მიხედვით უკვე არ არის საკმარისი იმ მოთხოვნილებების დასაკმაყოფილებლად, რომელიც პანდემიამდე საკმარისი იყო. პანდემიამ მოიტანა უკიდურესი გაჭირვება და სიღატაკე. ფაქტობრივად ყოველი 4 ოჯახიდან 3 ღარიბია, რაც მძიმე სოციალური ფონის მანიშნებელია“, - ამბობს პაატა აროშიძე ,,კომერსანტთან“.

მისივე ინფორმაციით, ბოლო 2 წელიწადში 10-15%-ით გაიზარდა ღარიბ-ღატაკთა რაოდენობა. ამ დროს ეროვნულ ეკონომიკაში ზრდის ორნიშნა მაჩვენებელი რიგითი მოქალაქეებისთვის არაფერს ნიშნავს, თუ კეთილდღეობას ადამიანები საკუთარ ჯიბეზე ვერ იგრძნობენ.

,,ზრდადი ეკონომიკა ინვესტიციებისთვის აუცილებელი პირობაა, მაგრამ ეს, ამავე დროს, მოსახლეობის მატერიალურ მდგომარეობაზეც უნდა აისახებოდეს. ხალხს ყველაზე მეტად სწორედ პენსიების და შემოსავლების ზრდა, ცხოვრების ხარისხი აინტერესებს. ვერაფრით ვერ მივაღწიეთ, რომ ეკონომიკურ განვითარებაში კეთილდღეობაც გამოიხატებოდეს, მაგრამ ეს კავშირი  დღესდღეობით დაკარგულია“, - აცხადებს პაატა აროშიძე.

შეგახსენებთ, რომ საქართველოს ეკონომიკა 2021 წელს, 2020 წელთან შედარებით, საშუალოდ 10.6%-ით გაიზარდა. ამასთან, 3.1%-იანი ზრდა ფიქსირდება 2019 წლის მაჩვენებელთან შედარებითაც. თუმცა, 2021 წელს ეკონომიკის ზრდის ფონზე სიღარიბის მაჩვენებელიც გაიზარდა. აღნიშნულ პერიოდში  სოციალური შემწეობის მიმღებთა რაოდენობამ 22,6%-ით მოიმატა.

სოციალური მომსახურების სააგენტოს ვებ-გვერდზე გამოქვეყნებული სტატისტიკის მიხედვით, 2021 წლის დეკემბერში საარსებო შემწეობას 643 167 ადამიანი იღებდა, ეს კი 118 569-ით მეტია წინა წლის ანალოგიური პერიოდის მაჩვენებელთან შედარებით. 2020 წლის დეკემბერში სახელმწიფოს დახმარების იმედად 524 598 ადამიანი იყო.

მარი ჩიტაია