2022 წლის განმავლობაში საქართველოდან უცხოეთში 590 მილიონი დოლარის ღირებულების 58 ათასი ავტომობილი გავიდა ექსპორტზე, რაც 75%-ით მეტია წინა წელთან შედარებით. ყველაზე მეტი 22 ათასი ავტომობილი ექსპორტზე აზერბაიჯანში გავიდა. ამასთან, ქვეყნებს შორის მეორე ადგილზეა უკრაინა, სადაც ექსპორტი 69%-ით არის გაზრდილი. ყველაზე დიდი ზრდა, მესამე ადგილზე მყოფ სომხეთშია, სადაც 69 მლნ დოლარის ტრანსპორტი გავიდა და ზრდამ წინა წელთან შედარებით 1805% შეადგინა. მეოთხე-მეხუთე ადგილი კი შესაბამისად ყაზახეთმა და რუსეთმა დაიკავა.
ავტო-იმპორტიორთა ასოციაციის ხელმძღვანელი ლაშა დარბაისელი „კომერსანტთან“ ამბობს, რომ ყაზახეთის ბაზარზე რეექსპორტი წინა წლებთან შედარებით 3-ჯერ არის გაზრდილი, ტაჯიკეთში 1.5-ჯერ, ყირგიზეთში კი 2.5-ჯერ.
„ავტომობილების ექსპორტი გაზრდილი არის ყაზახეთის, ყირგიზეთის და ტაჯიკეთის მიმართულებით, ამ ქვეყნებში რეალურად ხდებოდა რუსეთიდან ავტომობილების იმპორტი, სანქციების დაწესების შემდეგ, ისინი ვეღარ ახდენენ შუა აზიის ქვეყნებისთვის ავტომობილების მიწოდებას, ამიტომ საქართველო ალტერნატივა გახდა.
ყაზახეთის ბაზარზე რეექსპორტი წინა წლებთან შედარებით 3-ჯერ არის გაზრდილი, ტაჯიკეთში 1.5-ჯერ, ყირგიზეთში 2.5-ჯერ. დარწმუნებული ვარ, არსებული ვითარება ომის დასრულების შემდეგაც შენარჩუნდება. ყაზახი იმპორტიორები აღნიშნავენ, რომ ჩვენ მათ მომსახურებას უფრო დაბალ ფასში ვთავაზობთ და უფრო უსაფრთხო გზას.
რაც შეეხება სომხეთს, ქართველმა ავტო-იმპორტიორებმა ყველაზე დიდი ზარალი მივიღეთ 2019 წელს, როცა დავკარგეთ ეს ბაზარი, ახლა ვითარება იცვლება. თუმცა სომხეთის ბაზარი შესაძლოა კონკურენტად მოვიაზროთ, რომელიც 800 მლნ დოლარს წაიღებს. ბევრი ჩემი ახლობელი და ნაცნობი ყაზახიც, რომელიც კონკრეტულ მოდელს ეძებდა, ვერ იპოვა საქართველოში და სომხეთში შეიძინა. ასეთი ფაქტებიც ფიქსირდება არც თუ იშვიათად. ასევე, სომხეთიდან და ყაზახეთიდან, დიდი შანსია, რომ ავტომობილები რუსეთში გადიოდეს.
მოთხოვნის ტიპი არ იცვლება, რეექსპორტზე ძირითადად „ჰიუნდაისა“ და ,,ტოიოტას“ მარკის ავტომობილები გადის. ჰიბრიდულ ძრავზე მომუშავე ავტომობილებს დიდად არ ითხოვენ ავტონაწილების და ავტოსერვისის ხელმიუწვდომლობის გამო. ჰიბრიდებზე მოთხოვნა უფრო მეტად სომხეთშია“, — აღნიშნა ლაშა დარბაისელმა.
სტატისტიკის მიხედვით, ექსპორტზე გასული ერთი ავტომობილის საშუალო ფასი 10 ათას დოლარს შეადგენდა. ექსპორტირებული ერთეული ავტომობილის საშუალო ფასი არაბთა გაერთიანებულ საამიროებშია, რაც 71 ათას დოლარს შეადგენს. ყველაზე დაბალი საშუალო ფასი კი ყირგიზეთში რეექსპორტირებულ ავტომობილებს ჰქონდა, რაც საშუალოდ 5.9 ათას დოლარს შეადგენდა.