არაღიარებული მთიანი ყარაბაღის რესპუბლიკაში საომარი მდგომარეობა გამოცხადდა.
„სპუტნიკ-არმენიას“ ცნობით, მთიანი ყარაბაღის საინფორმაციო შტაბის ინფორმაციით, ასკერანის რაიონის სოფელ ფარუხში შეჭრის შემდეგ, აზერბაიჯანის შეიარაღებულმა ძალებმა აგრესიული ქმედებები განახორციელეს კარაგლუხის სიმაღლეებისკენ, რომელიც რუსი სამშვიდობო კონტიგენტის პასუხისმგებლობის ზონაში მდებარეობს. სომხური მედიის ინფორმაციით, აზერაიჯანის შეიარაღებულმა ძალებმა დღეს არცახის სიღრმისკენ გადაადგილება სცადეს. ამ მონაკვეთზე ოპერატიულ-ტაქტიკური მდგომარეობა კვლავინდებურად დაძაბული რჩება. სააგენტოს ცნობით, რუს „სამშვიდობოებთან“ ერთად, მიმდინარეობს ვითარების სტაბილიზება.
„არცახის შეიარაღებულმა ძალებმა განახორციელეს სათანადო ქმედებები მათ შესაკავებლად. რამდენჯერმე განხორციელდა სროლა. მოწინააღმდეგის მხარის დივერსიული ხასიათის ქმედებები აღიკვეთა,“ - წერს სომხური მედია.
მოგვიანებით „სპუტნიკ-არმენიამ“ გაავრცელა რუსეთის თავდაცვის სამინისტროს განცხადებასა, რომლის თანახმადაც მთიან ყარაბაღში რუსეთის ე.წ. სამშვიდობო კონტიგენტის სარდლობა ღებულობს ზომებს ვითარების დასარეგულირებლად და აზერბაიჯანის ჯარის საწყის მდგომარეობაში დასაბრუნებლად. განცხადებაში აღნიშნულია, რომ აზერბაიჯანულ მხარეს გაეგზავნა მოწოდება ჯარის გაყვანასთან დაკავშირებით.
„24-დან 25 მარტამდე აზერბაიჯანის შეიარაღებულმა ძალებმა დაარღვიეს 2020 წლის 9 ნოემბრის რუსეთის, აზერბაიჯანისა და სომხეთის ლიდერთა სამმხრივი განცხადების დებულება, შევიდნენ რუსი სამშვიდობო კონტინგენტის პასუხისმგებლობის ზონაში მთიანი ყარაბაღის ტერიტორიაზე და განათავსეს სადამკვირვებლო საგუშაგო. განახორციელეს ოთხი დარტყმა უპილოტო საფრენი აპარატის მეშვეობით მთიანი ყარაბაღის შეიარაღებული ფორმირების ქვედანაყოფზე დასახლებულ პუნქტ ფარუხზე“, - ნათქვამია რუსეთის თავდაცვის სამინისტროს განცხადებაში.
მალევე აზერბაიჯანის თავდაცვის სამინისტრო რუსეთის თავდაცვის სამინისტროს განცხადებას გამოეხმაურა და უკმაყოფილება გამოხატა, რომ რუსეთი ცალმხრივ განცხადებას ავრცელებს.
„აზერბაიჯანის თავდაცვის სამინისტრო წუხილს გამოთქვამს რუსეთის თავდაცვის სამინისტროს 2022 წლის 26 მარტის ცალმხრივი განცხადების გამო, რომელიც სინამდვილეს არ შეესაბამება. 25 მარტს თავდაცვის მინისტრის გენერალ-პოლკოვნიკ ზაქირ გასანოვის რუსეთის თავდაცვის მინისტრ სერგეი შოიგუსთან სატელეფონო საუბრისას განიხილეს აზერბაიჯანის ტერიტორიაზე არსებული ვითარება, რომელზეც დროებით იმყოფება რუსეთის სამშვიდობო კონტინგენტი. აზერბაიჯანულმა მხარემ განაცხადა, რომ ზუსტდება პოზიციები და ადგილები საარჩევნო უბნებზე. თუმცა, 26 მარტს, სომხეთის უკანონო შეიარაღებული ფორმირებების წევრებმა განახორციელეს დივერსიის მცდელობა აზერბაიჯანის არმიის ქვედანაყოფებში. დაუყოვნებელი ქმედებების შედეგად, სომხეთის უკანონო ფორმირებების წევრები იძულებული გახდნენ, უკან დაეხიათ“, - ნათქვამია აზერბაიჯანის თავდაცვის სამინისტროს განცხადებაში.
უწყებაში აღნიშნეს, რომ აზერბაიჯანი კვლავაც მხარს უჭერს 2020 წლის 10 ნოემბრის სამმხრივ განცხადებას და არ დაურღვევია მისი არც ერთი დებულება. მათივე განცხადებით, არსებული შეთანხმების მე-4 პუნქტის შესაბამისად, ამ დრომდე არ განხორციელებულა სომხეთის არმიის დარჩენილი ნაწილის სრულად გაყვანა აზერბაიჯანის ტერიტორიიდან, „შესაბამისად, სწორედ სომხეთი არღვევს აღნიშნულ შეთანხმებას და არა აზერბაიჯანი“, - აღნიშნულია აზერბაიჯანის ოფიციალურ საპასუხი განცხადებაში.
ოფიციალური ბაქო შენიშვნას აძლევს მოსკოვს და უხსნის, რომ ტერმინი, მთიანი ყარაბაღი, არ არსებობს. აზერბაიჯანი რუსეთს სხვა შეცდომებზეც მიუთითებს.
აზერბაიჯანში აცხადებენ, რომ რუსეთის მიერ გავრცელებული განცხადება ეწინააღმდეგება ორმხრივი ურთიერთობების არსს და სამოკავშირეო ურთიერთთანამშრომლობის დეკლარაციას, რომელსაც ქვეყნებს შორის ხელი მიეწერა 2022 წლის 22 თებერვალს. მათივე განცხადებით, აზერბაიჯანის ტერიტორიაზე არ არსებობს ადმინისტრაციულ-ტერიტორიული ერთეული სახელწოდებით „მთიანი ყარაბაღი“, ხოლო განცხადებაში ხსენებული სოფლის სახელწოდებაა არა ფურუხი, არამედ ფარუხი.
აზერბაიჯანის თავდაცვის სამინისტრო ავალებს რუსეთის თავდაცვის სამინისტოს, უზრუნველყოს სომხეთის არმიის დარჩენილი ნაწილის სრული გაყვანა საერთაშორისოდ აღიარებულ აზერბაიჯანის ტერიტორიიდან სამმხრივი განცხადების დებულების შესაბამისად.
„გთხოვთ, არ დაწეროთ, არ გამოიყენოთ ტერმინი „მთიანი ყარაბაღი“ და მართებულად მოიხსენიოთ აზერბაიჯანის ტერიტორიები“, - ნათქვამია განცხადებაში.