სომხეთმა 2022 წელს საქართველოში უფრო მეტი ელექტროენერგიის ექსპორტი მოახდინა, ვიდრე წინა 10 წლის განმავლობაში. ამის შესახებ რესპუბლიკის ტერიტორიული მართვისა და ინფრასტრუქტურის მინისტრის მოადგილემ ჰაკობ ვარდანიანმა ეროვნულ ასამბლეაში 11 იანვარს ეკონომიკურ საკითხთა მუდმივმოქმედი საპარლამენტო კომისიის სხდომაზე სიტყვით გამოსვლისას განაცხადა.

2022 წელს სომხეთმა საქართველოში 365 მლნ კვტ/სთ  ელექტროენერგიის ექსპორტი განახორციელა, 2012 წლიდან 2021 წლის ჩათვლით ეს მაჩვენებელი 242 მლნ კვტ/სთ-ს შეადგენდა.

„ეს ძირითადად გამოწვეულია ბაზრის ლიბერალიზაციის შედეგად, რომელიც გასულ წელს დაიწყო. გამარტივება ექსპორტზეც აისახა. ადრე ძალიან რთული იყო ნებართვის მიღება, საჭირო იყო საბუთების შეგროვება „ელექტროენერგეტიკული სისტემის ოპერატორის“, „ელექტროენერგეტიკული სისტემის ანგარიშსწორების ცენტრიდან“, „სომხეთის მაღალი ძაბვის ქსელიდან“, ასევე საჯარო სერვისების მარეგულირებელი კომისიიდან, რომელიც შემდგომ ბაზარმა დაარეგულირა,“ - განმარტა ვარდანიანმა.

მისი თქმით, სანამ ექსპორტის მსურველი ელექტროსადგურები ყველა ამ ნებართვას იღებდნენ, ქართულ ბაზარზე შესაძლებლობების ფანჯარა დღითიდღე სულ უფრო ვიწროვდებოდა. ახლა ნებართვის აღების პროცედურა მაქსიმალურად გამარტივდა. ასე რომ, ნებისმიერ ექსპორტიორს, იქნება ეს ელექტროსადგური თუ მისი დისტრიბუტორი, თუ მას აქვს ელექტროენერგია შეუძლია უბრალოდ წარადგინოს განაცხადი, დაურთოს ექსპორტის ხელშეკრულება საათობრივი მიწოდების გრაფიკით და „სისტემის ოპერატორს“ თავის მხრივ მოუწევს მიწოდების დაშვება ან აკრძალვა ერთი დღის განმავლობაში. ამ შემთხვევაში აკრძალვა გამართლებული უნდა იყოს.

„ამის შემდეგ, თავად ოპერატორი ავტომატურად ავალებს მაღალი ძაბვის ქსელს დეკლარირებული ელექტროენერგიის საზღვარგარეთ გატანას. ამრიგად, ზემოაღნიშნული პროცედურების გამარტივების შედეგად, 2022 წლის პირველ 8 თვეში საქართველოსკენ მიმავალი ელექტროგადამცემი ხაზი სრულად დაიტვირთა“, - განაცხადა  სომხეთის მთავრობის წარმომადგენელმა.