სომხეთში 11 ოქტომბერს კოვიდით 43 ადამიანი გარდაიცვალა, რაც პანდემიის დაწყებიდან დღემდე რეკორდულად მაღალი რაოდენობაა. სომხეთი რეგიონში ერთადერთი ქვეყანაა, სადაც საქართველოსთან შედარებით, პროცენტულად მოსახლეობის უფრო მცირე ნაწილია აცრილი.

სომხეთში ეპიდვითარება პანდემიის პირველივე ტალღაზე, 2020 წლის მარტში დამძიმდა. თუ 31 მარტს საქართველოში ინფიცირების სულ 110 შემთხვევა იყო დაფიქსირებული, ხოლო აზერბაიჯანში 298, სომხეთში უკვე 532-ზე იყო ასული. 31 აგვისტოს მდგომარეობით საქართველოში კოვიდით გარდაცვალების 19 შემთხვევა იყო აღრიცხული, სომხეთში 46-ჯერ მეტი - 879. აზერბაიჯანში კი 534. მთელი 6 თვის მანძილზე, სამხრეთ კავკასიის ყველაზე პატარა ქვეყანაში ინფიცირებულთა და გარდაცვლილთა რაოდენობა დანარჩენი ორის ჯამურ მაჩვენებელს აჭარბებდა.

საქართველოში მდგომარეობა 2020 წლის სექტემბრიდან დამძიმდა და სომხეთს ინფიცირებულთა რაოდენობით ნოემბერში, გარდაცვლილთა რაოდენობით კი 2021 წლის იანვარში გაუსწრო.

12 ოქტომბრის მდგომარეობით, საერთო ჯამში რეგიონში ყველაზე მძიმე მდგომარეობა საქართველოშია 640 ათასი ინფიცირებული და 9306 გარდაცვლილი. (სომხეთში 274 ათასი ინფიცირებული და 5618 გარდაცვლილი, აზერბაიჯანში 493 ათასი ინფიცირებული და 6677 გარდაცვლილი). მოსახლეობის რაოდენობის გათვალისწინებით საქართველო მე-13 ადგილზეა 1 მლნ-დან 2339 გარდაცვლილი, სომხეთი 29-ეზე 1 მლნ-დან 1891 გარდაცვლილი აზერბაიჯანი კი 97-ეზე 1 მლნ-დან 651 გარდაცვლილი.

აზერბაიჯანს სხვა უპირატესობაც გააჩნია, ის რეგიონში ლიდერია აცრების მაჩვენებლით. აზერბაიჯანში მოსახლეობის 48% 1 დოზითაა აცრილი, 40% ორივე დოზით. საქართველოში 1 დოზით 27% და ორივე დოზით 23.6%, ხოლო სომხეთში 1 დოზით 9% და ორივე დოზით 5%.

არათუ 5%, სიკვდილიანობის რეალურად შესამცირებლად მოსახლეობის 40%-ის აცრაც არასაკმარისია და მინიმუმ 60%-ზე გასვლაა აუცილებელი, თუმცა დღეს ეს მაჩვენებელიც უკვე არასაკმარისად მიიჩნევა. პორტუგალიასა და არაბეთის გაერთიანებულ საამიროებში უკვე მოსახლეობის 80%-ზე მეტია სრულად აცრილი.