მრავალწლიანი ისტორიის მქონე თბილისის სომხურ თეატრს ახალი შენობა კიდევ რამდენიმე წელი არ ექნება. დაგეგმილი მასშტაბური მშნებლობის დასრულება 2 წლით, 2023 წლამდე გადავადდა. თბილისის მერიამ პეტროს ადამიანის სახელობის სომხური სახელმწიფო დრამატული თეატრის დირექტორის ლუიზა ხაჩატუროვას განცხადება, შენობის მშენებლობის ნებართვის გახანგძლივებასთან დაკავშირებით, უკვე დააკმაყოფილა. მშენებლობის ვადის შეცვლის მოთხოვნით ხაჩატუროვამ არქიტექურის სამსახურს მიმდინარე წლის 30 ივნისს მიმართა.

ადამიანის სახელობის თეატრი წლების განმავლობაში უფუნქციოდ იყო დარჩენილი, ხოლო დასი სპექტაკლებს საკუთარი სცენის ნაცვლად სხვადსხვა თეატრში თამაშობდა. შექმნილი რთული ვითარების გამო, საქველმოქმედო ფონდ „ქართუს“ დაფინანსებით, მუნიციპალიტეტისა და ფონდის თანამშრომლობით თეატრის სამშენებლო-სარეკონსტრუქციო სამუშაოები დაიწყო. 2019 წელს ძველი შენობის სრული დემონტაჟი განხორციელდა. პროექტის მიხედვით კი  6 403 კვ.მ-ზე სრულიად ახალი შენობის აგება დაიგეგმა, შენობის ,რომელიც, ჯამში 607 მაყურებელს დაიტევდა. პროექტი, რომლის საერთო საპროგნოზო ღირებულება 18 მილიონ ლარს შეადგენდა და 2020 წლის ბოლოსთვის უნდა დასრულებულიყო, დღემდე მშენებლობის ეტაპზეა. აღსანიშნავია, რომ თეატრის დირექტორი, მშენებლობის განმარტებით ბარათში შენობის ნებართვის გახანგძლივების მიზეზებზე არაფერს წერს. ინფორმაციის გარკვევას „კომერსანტი“ლუიზა ხაჩატუროვასთან შეეცადა, თუმცა მან ჩვენს ზარს არ უპასუხა.

პეტროს ადამიანის სახელობის სომხური დრამატული თეატრის მსახიობებს ჰქონდათ მოლოდინი, რომ 2020 წელს საკუთარ თეატრს დაუბრუნდებოდნენ, თუმცა მრავალწლიანი დრამა გრძელდება და ახალი როლების მორგება მათ ისევ სხვა თეატრების სცენებზე მოუწევთ.