Sony-მ და Honda-მ, რომლებმაც შარშან ელექტრომობილების ერთობლივი  საწარმოს გახსნა დააანონსეს, მანქანის ახალი ბრენდის სახელი გუშინ Consumer Electronics Show - ზე გამოაცხადეს, მანქანას AFEELA  ერქმევა. 

Sony Honda Mobility-ის აღმასრულებელმა დირექტორმა იასუჰიდე მიზუნომ პრეზენტაციაზე  პირველი მანქანის პროტოტიპი წარმოადგინა, ელექტრომობილი საშუალო სედანის მსგავსია, მისი შეძენა კი 2025 წლიდან იქნება შესაძლებელი. 

როგორც მუზინომ აღნიშნა მანქანას უსაფრთხოებისა და მძღოლის დახმარების სისტემები Honda-სგან, ხოლო გასართობი და ინტერაქტიული ფუნქციები Sony-სგან ექნება. მისივე თქმით მანქანის შემუშავებისას აქცენტი პროგრამულ უზრუნველყოფასა და მომხმარებლის ინტერფეისის ტექნოლოგიაზე გაკეთდა. 

ელექტრომობილის ბამპერის ზემოთ არის ვიწრო გარე ეკრანი, რომელსაც კომპანია მედია ბარს უწოდებს. ეს საშუალებას მისცემს მანქანას აჩვენოს ინფორმაცია და დაუკავშირდეს ავტომობილის გარეთ მყოფ ადამიანებს, აღნიშნა მიზუნომ.

ელექტრომობილის შიგნით კი კომპანია  Unreal Engine გრაფიკული ტექნოლოგიით  მუშაობს,  აღსანიშნავია, რომ ეს  ტექნოლოგია უკვე  გამოიყენეს სხვა ავტომწარმოებლებმაც, მათ შორის General Motors-მა, რომელიც ამ ტექნოლოგიას იყენებდა Hummer EV-ში.

ავტომობილი  აღჭურვილი იქნება 45 კამერით, მას  ასევე ექნება შიდა და გარე სენსორები, რომელთაგანაც  ზოგიერთი მძღოლის მდგომარეობის დასადგენად  გამოიყენება, სენსორები ასევე  მძღოლის  სიფხიზლეს და უსაფრთხოებას გააკონტროლებს. 

თაკო კვაჭანტირაძე