სოხუმის აეროპორტი 2024 წელს გაიხსნება. 6000-ზე მეტი სიმაღლის ფრენებს რუსები დონის როსტოვის სადისპეჩეროდან გააკონტროლებენ.
აფხაზეთის დე ფაქტო პრეზიდენტმა, ასლან ბჟანიამ სოხუმის აეროპორტის გახსნა 2024 წლისთვის დააანონსა. ამის შესახებ ბჟანიამ ბაშკირეთში ყოფნის დროს განაცხადა, რასაც რუსული „ტასი“ ავრცელებს.
მისი თქმით, „სოხუმის აეროპორტის ამოქმედებისთვის უკვე გამოინახა ინვესტორი, რომელიც რუსულ კაპიტალსა და ინვესტიციებს უკავშირდება.“
აღსანიშნავია, რომ 1-ელ ივლისს სოხუმის აეროპორტი, ასლან ბჟანიასთან ერთად, აფხაზეთში საგანგებოდ ჩასულმა რუსეთის პრეზიდენტის ოფისის ხელმძღვანელმა უცხო ქვეყნებთან რეგიონთაშორისი და კულტურული ურთიერთობის საკითხებში, იგორ მასლოვმა მოინახულა. „აფსნიპრესის“ ცნობით, ბჟანია-მასლოვმა აფხაზეთსა და რუსეთს შორის საჰაერო მიმოსვლის ე.წ. საგზაო რუკა განიხილეს.
აეროპორტის ე.წ. დირექტორის, ვიაჩესლავ ეშბას ცნობით, „მიმდინარეობს კვლევითი სამუშაოები და დიზაინერები ძველი ასაფრენი ბილიკის საფარს იკვლევენ, თუ რამდენად არის შესაძლებელი მისი გამოყენება საწყის ეტაპზე, ძირითადი შეკეთების გარეშე. აეროპორტს 3640 მეტრის დიდი ზოლი, ორი მთავარი და ხუთი მოსახვევი ბილიკი აქვს.
„2008 წელს აქ 100-ზე მეტი „ილ-76“-ის თვითმფრინავი დაეშვა და დაფარვა კარგი აღმოჩნდა,“ - აცხადებს ეშბა.
აქ ეშბა 2008 წლის რუსეთ-საქართველოს ომს გულისხმობს, როცა 11 აგვისტოს, 15 წლის შემდეგ პირველად, აეროპორტში რამდენიმე ათეული რუსული სამხედრო-სატრანსპორტო თვითმფრინავი დაეშვა. რუსეთმა სოხუმის აეროპორტი მედესანტეებისა და სამხედრო აღჭურვილობის ათეულობით „ილ-76“-ით ტრანსპორტირებისთვის გამოიყენა. ამასთან, 2008 წლის 14 სექტემბერს 15 წლის განმავლობაში გაჩერებულ აეროპორტში პირველი სამოქალაქო თვითმფრინავი დაეშვა, რომლითაც სოხუმში სერგეი ლავროვი ჩაფრინდა.
ამჟამად დე ფაქტო მთავრობა რუსეთთან ამზადებს შეთანხმებას, 6 000 მეტრისა და მასზე ზემო საჰაერო სივრცის რუსეთისთვის ფრენების კონტროლის მიზნით გადასაცემად, რასაც დონის როსტოვის ცენტრი განახორციელებს. თავად აფხაზები საჰაერო მოძრაობას 6 000 მეტრზე ქვემოთ გააკონტროლებენ, რისთვისაც სადისპეჩერო უკვე მოაწყვეს და შესაბამისი ტექნიკა შეუკვეთეს. ამასთან, ვიაჩესლავ ეშბა ამბობს, რომ აფხაზურ მხარეს „საწვავისა და საპოხი მასალების ავზებიც გამზადებული აქვს, მოწესრიგდა სადრენაჟო სისტემა, ხოლო ელექტროენერგიისთვის ორი წყარო არსებობს.“
ფედერაციის ტრანსპორტის სამინისტროსა და საჰაერო ტრანსპორტის ფედერალურ სააგენტოსთან ერთად აფხაზები სპეციალისტების მოსამზადებელ სამოქმედო გეგმაზეც მუშაობენ. ეს ფრენების უზრუნველყოფის მთლიან პერსონალს და უშუალოდ პილოტებს შეეხება. აფხაზებმა რუსულ მხარეს სატრენინგე კანდიდატთა სია უკვე გადასცეს.
სოხუმიდან 18 კმ-ში, გულრიფშის რაიონის სოფელ ბაბუშარაში მდებარე აეროპორტი სამოქალაქო ავიაციის საერთაშორისო ორგანიზაციის (ICAO) გადაწყვეტილებით, ქართულ-აფხაზური კონფლიქტის დასრულების შემდეგ აღარ ფუნქციონირებს. საბჭოთა პერიოდში აეროპორტი ზაფხულის პერიოდში, დღეში 5000-მდე, ზამთარში კი 1000-მდე მგზავრს ემსახურებოდა. სოხუმის აეროპორტის ასაფრენი ბილიკის სიგრძე 3,6 კმ-ია, რაც როგორც მთების, ისე ზღვის მხრიდან, თითქმის, ყველა ტიპის სამოქალაქო თვითმფრინავის მიღებას ხდის შესაძლებელს.
ICAO აეროპორტს აფხაზების მიერ „მონათლულ“ საერთაშორისო აეროპორტად არ ცნობს, რადგან ორგანიზაცია საქართველოს ტერიტორიულ მთლიანობას აღიარებს. ICAO-მ 2006 წლის აგვისტოდან სოხუმის აეროპორტის კოდი გააუქმა და მის შესახებ ინფორმაცია დოკუმენტებიდან ამოიღო.
bpn.ge
სოხუმი
