პაბლო პიკასოს თეფში სოხუმის, დიმიტრი გულიას მუზეუმში დააბრუნეს. ამის შესახებ ინფორმაციას Apsadgil.info მუზეუმის დირექტორზე სვეტლანა კორსაიას კომენტარზე დაყრდნობით ავრცელებს.
„პაბლო პიკასოს ფირფიტა, რომელიც დიმიტრი გულიას მუზეუმს ეკუთვნოდა, დაგვიბრუნეს. ჩვენ ის ფხაზეთის რესპუბლიკის ეროვნულ ბანკს შესანახად გადავეცით, სადაც ჩვენი სხვა ძვირფასი ნივთები ინახება. ნამუშევრების შენახვის განაწესში ცვლილება შევტანეთ, რომლის თანახმად ნამუშევრის მოხსნა შესაძლებელია მხოლოდ კულტურის მინისტრის, მუზეუმის დირექტორის და მუზეუმის მთავარ კურატორის მონაწილეობით, მხოლოდ ერთ ადამიანს მისი ჩამოხსნის უფლება არ ექნება“, - აღნიშნა კორსაიამ.
პაბლო პიკასოს თეფში, ფრანგი მხატვრის ფერნანდ ლეჟეს ორ ნამუშევართან ერთად, მუზეუმს გულიას ახლო მეგობარმა, მწერალმა კონსტანტინე სიმონოვმა უბოძა.
2022 წლის ნოემბრის ბოლოს ცნობილი გახდა, რომ ფირფიტა დაიკარგა. როგორც მაშინ მუზეუმის დირექტორმა სვეტლანა კორსაიამ განაცხადა, 2021 წლის 25 თებერვალს, ექსპონატი ლეჟეს ორ ნახატთან ერთად აფხაზეთის ბანკის სარდაფიდან ამოიღეს და კულტურის ყოფილ მინისტრს გუდისა აგრბას გადაეცა. . მას შემდეგ ფირფიტის ბედი უცნობი იყო.
ექსპონატის დაკარგვის შესახებ შეტყობინების შემდეგ, აფხაზეთის სახელმწიფო უსაფრთხოების სამსახურმა შემოწმება დაიწყო. მოგვიანებით, კულტურის სამინისტროს ხელმძღვანელმა დაურ კოვემ განაცხადა, რომ 2022 წლის დასაწყისში ფირფიტა მოსკოვში გაგზავნეს ექსპერტიზაზე. თუმცა, როგორც კორსაიამ აღნიშნა, ექსპერტიზა არასოდეს ჩატარებულა, ექსპონატის საცავიდან ამოღების მიზანი უცნობია.