გასული წლის დეკემბრის ბოლოს მიღებული დადგენილებით, შემცირდა სპეციფიკური სამუშაო რეჟიმის მქონე დარგების ჩამონათვალი. მათ შორის აღარ გვხვდება ისეთი საქმიანობები, როგორიცაა: მშენებლობა, ტექსტილის და ტექსტილის ნაწარმის, ტყავის, ტყავის ნაწარმისა, ფეხსაცმლის წარმოება, ქაღალდის მრეწველობა, სასტუმროები და რესტორნები.

ეს გულისხმობს იმას, რომ ამ სფეროებში დასაქმებული ადამიანები 40-საათიან სამუშაო რეჟიმში მოექცევიან და ზეგანაკვეთური სამუშაოს ანაზღაურებას შრომის კოდექსით გათვალისწინებული წესით მიიღებენ. ბიზნესი ამბობს, რომ ეს გადაწყვეტილება მათ სირთულეს უქმნით, რადგან 2023 წლის ბიუჯეტი დაგეგმილი ჰქონდათ და კანონის გადავადებას მოითხოვენ.

შრომის ინსპექციის სამსახურის ხელმძღვანელმა ბექა ფერაძემ რადიო „კომერსანტის“ ეთერში განაცხადა, რომ პირველ ეტაპზე ბიზნესის წარმომადგენლებს კონსულტირებასა და ადაპტირებაში დახმარებას სთავაზობენ. რაც კანონის ამოქმედებიდან პირველი სამი თვის განმავლობაში ბიზნესისთვის კონსულტაციების გაწევას გულისხმობს, რომ ისინი ახალ რეალობას მოერგონ და კანონთან ადაპტირდნენ. სპეციფიკური სამუშაო რეჟიმის მქონე დარგების ჩამონათვალის შესახებ მიღებული კანონის გადავადება კი არ განიხილება.

„თუ ბიზნესის არგუმენტი არის ის, რომ წლის ბოლოს იქნა კანონი მიღებული და დრო არ ჰქონდათ ცვლილებებისთვის, ჩვენ ვეუბნებით მათ, რომ პირველ სამ თვეს კონსულტირებასა და ადაპტირებას დავუთმობთ და ჩვენი მხრიდან, პრაქტიკულად, ღონისძიების გატარება არ მოხდება სხვა. პირიქით, კონსულტაციას გავუწევთ -  როგორ მოხდეს აღნიშნული დადგენილების პრაქტიკაში იმპლემენტაცია და ეტაპობრივად მათ მოუწევთ კადრებისთვის ან ანაზღაურების გაზრდა ან საკადრო ცვლილების განხორციელება. მაგრამ კანონის გადავადება არ განიხილება. როცა ჩვენ საუბარი გვაქვს, რომ 48-საათიანი სამუშო კვირა 40-საათამდე შემცირდა, ეს ნიშნავს, რომ 40 საათის ზემოთ, ზეგანაკვეთურად უნდა აუნაზღაურონ დასაქმებულს,“ - აცხადებს ბექა ფერაძე.

მისი თქმით, პირველ ეტაპზე ბიზნესისთვის სანქცირების მექანიზმს არ გამოიყენებენ.

„ლავირების საშუალება გვაქვს - ინსპექტირების პროცესში შეგვიძლია გამოვიყენოთ გაფრთხილება ან დაჯარიმება, მაგრამ თუ საჩივარია შემოსული და დარღვევის მასშტაბი დიდია, ინსპექტირების უფრო მძლავრ მექანიზმს გამოვიყენებთ, მაგრამ განსაკუთრებით პირველ ეტაპზე მზად ვართ, რომ კონსულტირებას და ცნობიერების ამაღლებას დავუთმოთ დრო“, - აცხადებს ბექა ფერაძე.